Літва нанесла маштабны ўдар па «балонікавай» мафіі: затрыманыя кіраўнікі і дзясяткі кантрабандыстаў
Праваахоўныя органы Літвы правялі беспрэцэдэнтную аперацыю супраць арганізаванай групоўкі, якая займалася кантрабандай цыгарэт з Беларусі з выкарыстаннем метэаралагічных паветраных шароў. У выніку аперацыі быў затрыманы 21 чалавек, у тым ліку меркаваныя лідары злачыннай арганізацыі.
У правядзенні аперацыі і ў ператрусах удзельнічалі больш за 140 афіцэраў, у тым ліку супрацоўнікі атрада па барацьбе з тэрарызмам «Aras», паведамляе 15min.lt.
Ранкам у аўторак быў затрыманы 21 чалавек, у тым ліку арганізатары злачыннай групоўкі.
Акрамя кантрабанды, іх падазраюць у садзейнічанні замежнай дзяржаве ў дзейнасці супраць Літвы.
Пасля правядзення больш за 80 ператрусаў, былі знойдзены і канфіскаваны цыгарэты з беларускімі бандэролямі, SIM-карты, абсталяванне для сачэння і сувязі, агнястрэльная зброя і іншае.
Канфіскавана і арыштавана маёмасць, у тым ліку элітныя аўтамабілі і іншыя каштоўнасці, на агульную суму каля 720 тысяч еўра.
Паводле звестак следства, злачынная групоўка дзейнічала сістэмна, з вельмі строгай канспірацыяй і размеркаваннем роляў. Арганізатары падтрымлівалі прамыя кантакты з памагатымі ў Беларусі. З Беларусі пры спрыяльных умовах надвор'я запускаліся паветраныя шары з кантрабандай.
Для адсочвання перамяшчэння балонаў выкарыстоўвалася GPS-абсталяванне і спецыяльныя праграмы. Выканаўцам перадаваліся дакладныя каардынаты пасадкі на тэрыторыі Літвы.
Праваахоўныя органы падкрэсліваюць, што гэтая крымінальная дзейнасць несла вялізарную шкоду нацыянальнай бяспецы і эканамічным інтарэсам краіны, а таксама стварала пагрозу цывільнай авіяцыі.
Каментары