Прэзідэнт Украіны Уладзімір Зяленскі заявіў, што Злучаныя Штаты маглі б правесці спецаперацыю па захопе кіраўніка Чачні Рамзана Кадырава. На думку ўкраінскага лідара, гэта стала б дзейсным інструментам ціску на Уладзіміра Пуціна для спынення вайны.
Зяленскі правёў паралелі з нядаўняй аперацыяй супраць прэзідэнта Венесуэлы Нікаласа Мадура.
«Калі ласка, вось вам прыклад з Мадура. Правялі аперацыю. Вынік усе бачылі, увесь свет. Зрабілі гэта хутка. Ну, няхай яны [ЗША] правядуць якую-небудзь аперацыю з гэтым, як яго… з Кадыравым, з гэтым забойцам. Можа, тады Пуцін убачыць гэта і задумаецца», — сказаў Зяленскі падчас размовы з журналістамі.
Прэзідэнт Украіны падкрэсліў, што Вашынгтон валодае ўсімі неабходнымі інструментамі для рэальнага ціску на Расію і ўмее імі карыстацца. Галоўнае, паводле яго слоў, — каб Украіна заставалася для ЗША прыярытэтам.
Зяленскі адзначыў, што прадстаўнікі каманды Дональда Трампа вядуць перамовы з Расіяй, але Масква пакуль «круціць носам». У адказ на такія паводзіны ўкраінскі лідар папярэдзіў Крэмль: у Кіева «дастаткова моцныя» партнёры, якія пры жаданні «могуць нос адкруціць».
Таксама Зяленскі акрэсліў план дзеянняў на выпадак, калі дыпламатычны трэк з мірным пагадненнем не спрацуе праз пазіцыю РФ. У такім разе Украіне спатрэбіцца максімальная падтрымка для абароны: сістэмы СПА, фінансаванне вытворчасці дронаў і абарона неба.
«Партнёры ўсё ведаюць. Яны павінны рухацца хутчэй. Нібы вайна не ў нас, а ў іх», — рэзюмаваў Зяленскі.
Цяпер чытаюць
Беларуска распачала чэлендж «40 спатканняў», але ўжо на сярэдзіне не хавае расчаравання ў мужчынах52
Каментары
Такі дзетсад, але ж шмат якім украінцам такое падабаецца.