Удзельнічаў у парадзе, а цяпер экстрэміст. За палітыку асудзілі мазырчука
34‑гадовага Міхаіла Палазніка асудзілі, імаверна, па справе Гаюна.
Міхаілу Палазніку 34 гады. Родам ён з Мазыра. У 2013—2014 гадах праходзіў службу ў Мінску — відавочна, у войсках сувязі. Міхаіл нават браў удзел у афіцыйным парадзе 3 ліпеня 2014 годзе, за што быў узнагароджаны граматай з медалём і падзякай ад Лукашэнкі за подпісам тагачаснага міністра абароны Юрыя Жадобіна.
Палазнік захапляецца аўтамабілямі. Мяркуючы з яго сацсетках, Міхаіл — фанат маркі Peugeot, ездзіў на мадэлі 308 і добра ў іх разбіраўся. Ён часта дапамагаў іншым аўтааматарам парадамі па рамонце, дзяліўся інструкцыямі, як разабраць панэль ці паправіць праводку.
Міхаіла судзілі паводле частак 1 і 2 артыкула 361‑4 Крымінальнага кодэкса («Садзейнічанне экстрэмісцкай дзейнасці»). Дакладныя абставіны справы невядомыя, але часта па гэтым артыкуле судзяць за паведамленні ў чат-бот канала «Беларускі Гаюн».
Прысуд ужо ўступіў у законную сілу, і цяпер мужчына адбывае пакаранне — мяркуючы з усяго, гэта хімія з накіраваннем.
«Наша Нiва» — бастыён беларушчыны
ПАДТРЫМАЦЬ
Каментары