Адно з самых папулярных месцаў адпачынку беларускай сталіцы хочуць абнавіць і надаць яму адметную мастацкую атмасферу. Упраўленне культуры Мінгарвыканкама запрасіла да ўдзелу ў творчым конкурсе па распрацоўцы эскізаў скульптур для Цэнтральнага дзіцячага парку імя Максіма Горкага.
Да ўдзелу ў конкурсе запрашаюць прафесійных скульптараў, архітэктараў, а таксама творчыя калектывы. Паводле яго ўмоў, скульптурныя кампазіцыі павінны адпавядаць традыцыям беларускай дэкаратыўнай паркавай скульптуры, гарманічна спалучацца з навакольнай архітэктурай і ландшафтам, а таксама быць суразмернымі прасторы парку. Пры ацэнцы работ будзе ўлічвацца прафесійны ўзровень, арыгінальнасць і захаванне ўсіх патрабаванняў конкурсу.
Конкурс пройдзе з 26 студзеня па 27 лютага 2026 года. Заяўкі і неабходныя дакументы трэба падаць ва ўпраўленне культуры да 9 лютага. Самі эскізныя праекты прымаюцца да 20 лютага ў Музеі гісторыі горада Мінска, падрабязнасці — на афіцыйным сайце Мінгарвыканкама.
Вясной 2025 года ў парку Горкага завяршылася маштабная рэканструкцыя. Там з’явіліся новыя зоны адпачынку, абноўленыя атракцыёны і інжынерныя сеткі, а замест старых кіёскаў паставілі сучасныя павільёны ў адзіным стылі ўздоўж галоўных алеяў і на набярэжнай.
Парк быў заснаваны ў 1805 годзе мінскім губернатарам Захарыем Карнеевым і спачатку называўся Губернатарскім садам. Сёння ён займае каля 28 гектараў і застаецца адным з найбуйнейшых і самых наведвальных паркаў Беларусі.
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА77
Каментары
Daŭno nia byŭ tam, siadžu va Ŭruččy, lanota daloka jechać...