Топ-менеджарку OpenAI звольнілі за сэксуальную дыскрымінацыю супрацоўніка-мужчыны

Як піша The Wall Street Journal, у пачатку студзеня OpenAI, лідар у сферы штучнага інтэлекту, разарвала кантракт з Раян Баермайстар — віцэ-прэзідэнткай, якая ўзначальвала каманду па прадуктовых палітыках. Пад «прадуктовымі палітыкамі» маюцца на ўвазе правілы і нормы, якія рэгулююць, як карыстальнікі могуць выкарыстоўваць прадукты OpenAI —напрыклад, ChatGPT, GPT-мадэлі, API, GPT Store, Sora ды іншыя сэрвісы.

Паводле слоў людзей, знаёмых з сітуацыяй, пра звальненне топ-менеджарка даведалася пасля адпачынку.

Кіраўніцтва патлумачыла, што рашэнне аб спыненні працоўных адносін звязана з сэксуальнай дыскрымінацыяй з яе боку ў дачыненні да аднаго з калег-мужчын. Гэта даволі незвычайная прычына для звальнення. На гэты момант канкрэтныя дэталі таго, што менавіта яна зрабіла ці сказала, не разгалошваюцца. 

Сама Баермайстар абвяргае гэтыя закіды. У афіцыйнай заяве яна падкрэсліла: «Абвінавачванне ў тым, што я кагосьці дыскрымінавала, абсалютна хлуслівае».

У той жа час прадстаўнікі OpenAI, аддаючы належнае яе прафесійным дасягненням, настойваюць, што звальненне не мае ніякай сувязі з яе поглядамі на палітыку кампаніі або ўнутранымі спрэчкамі.

Крыніцы WSJ унутры кампаніі звязваюць звальненне з прынцыповай пазіцыяй Баермайстар адносна будучыні ChatGPT.

Яе сыход адбываецца напярэдадні запланаванага на пачатак гэтага года запуску рэжыму, які дазволіць карыстальнікам ствараць у ChatGPT эратычны кантэнт з дапамогай штучнага інтэлекту. Гэтая функцыя, якая дапускае размовы на дарослыя і сэксуальныя тэмы для паўналетніх карыстальнікаў, выклікала крытыку з боку даследчыкаў кампаніі. Яны выказалі здагадку, што сэксуальны кантэнт можа ўзмацніць пачуцці некаторых карыстальнікаў да ШІ-персон, якіх яны ўспрымаюць як сваіх сяброў.

Члены кансультатыўнай рады па пытаннях «дабрабыту і штучнага інтэлекту», якую рэгулярна склікае OpenAI, таксама выказаліся супраць «рэжыму для дарослых» і заклікалі кампанію перагледзець планы па яго запуску.

Паводле слоў людзей, знаёмых з сітуацыяй, Баермайстар была адной з некалькіх супрацоўнікаў OpenAI, хто выказваў трывогу з нагоды запуску рэжыму для дарослых. Перад звальненнем яна адкрыта папярэджвала калег пра магчымыя шкодныя наступствы гэтага кроку для карыстальнікаў. На яе думку, механізмы OpenAI па блакаванні кантэнту з эксплуатацыяй дзяцей недастаткова эфектыўныя, а кампанія не здольная надзейна абараніць падлеткаў ад кантэнту для дарослых.

Пры гэтым, як заўважае WSJ, генеральны дырэктар OpenAI Сэм Альтман займае іншую пазіцыю. Ён публічна адстойвае пашырэнне межаў дазволенага, заяўляючы, што кампанія павінна «ставіцца да дарослых карыстальнікаў як да дарослых». Гэтая стратэгія абумоўлена жорсткай канкурэнцыяй на рынку.

Штотыдзень ChatGPT прыцягвае больш за 800 мільёнаў карыстальнікаў у межах стратэгіі OpenAI па стварэнні самага дасканалага штучнага інтэлекту. Цяпер кампанія плануе манетызаваць гэтую актыўнасць з дапамогай рэкламы.

OpenAI уважліва сочыць за канкурэнтамі і ў снежні абвясціла ўнутраны «чырвоны ўзровень небяспекі» пасля нечаканага поспеху і росту чат-бота Gemini ад Google. Іншы канкурэнт, xAI, выявіў, што больш свабодныя правілы вакол кантэнту сэксуальнага характару ў яго чат-боце Grok дапамаглі павялічыць уцягнутасць карыстальнікаў.

Хто такая Раян Баермайстар?

Баермайстар прыйшла ў OpenAI ў сярэдзіне 2024 года, перайшоўшы з Meta (былой Facebook). Яна была часткай хвалі топ-менеджараў, якія ставілі за мэту рэфармаваць тэхналагічныя гіганты знутры, робячы іх больш этычнымі.

Акрамя сваёй асноўнай працы, яна актыўна займалася карпаратыўнай культурай. У пачатку 2025 года Баермайстар запусціла ў OpenAI праграму ментарства для жанчын. Гэтая ініцыятыва дапамагала супрацоўніцам з розных аддзелаў аб’ядноўвацца ў групы для абмеркавання кар’ерных стратэгій і падтрымкі адна адной.

• 3
• 2
• 2
• 2
• 0
• 2
• 1
• 0