Нарвегія выйграла медальны залік Алімпіяды. Столькі золата не было яшчэ ніколі
Беларусь упершыню з 1994 года не заваявала ніводнай узнагароды.
Сёння апошні дзень Алімпіяды, будуць разыграныя яшчэ некалькі камплектаў узнагарод, але Нарвегію ўжо не дагнаць.
На яе рахунку 40 узнагародаў, у тым ліку 18 залатых, па 11 сярэбраных і бронзавых.
Нарвежцы не проста датэрмінова гарантавалі сабе першае месца, але і сабралі рэкордную калекцыю залатых узнагарод. Усяго ў скандынаўскіх атлетаў ажно 18 перамог!
Столькі раней не меў ніхто і ніколі. Папярэдні рэкорд, дарэчы, таксама належаў нарвежцам: у Пекіне-2022 у іх было 16 залатых.
Шэсць залатых узнагарод выйграў нарвежскі лыжнік Ёханес Клэба, прычым чатыры ў індывідуальных спаборніцтвах. Клэба на гэтай Алімпіядзе выйграў усё золата ў мужчынскіх лыжных дысцыплінах.
На другім радку з 11 залатымі перамогамі размясцілася зборная ЗША. Сёння амерыканцы могуць выйграць золата ў мужчынскім хакейным турніры, калі ў фінале абыграюць Канаду (пачатак матча а 16:10 па Мінску).
У Нідэрландаў і Італіі па 10 залатых перамог. Чым адметныя Нідэрланды? Яны заваявалі 20 узнагарод (10 залатых, 7 сярэбраных і тры бронзавыя).
Беларусь упершыню з 1994 года, калі стала выступаць асобнай камандай, не заваявала на Зімовай Алімпіядзе ніводнай узнагароды.
Праўда, на гэтых Гульнях з-за міжнародных банаў у шэрагу дысцыплін, у тым ліку медальным біятлоне, удзел бралі толькі сем спартовак. Але раней прывозілі хоць адну ўзнагароду, як у 2002 ці 2006 гадах. У Сочы-2014 наогул быў найлепшы вынік — шэсць медалёў (5 залатых і 1 бронзавы). У Пекіне-2022 было два срэбры.
Найлепшы вынік у Італіі паказалі канькабежка Марына Зуева, якая заняла 6‑е месца ў забегу на 5000 метраў, і фрыстайлістка Ганна Гуськова з восьмым месцам у фінале па лыжнай акрабатыцы.
Усяго медалі на гэтай Алімпіядзе заваявалі прадстаўнікі 30 краін, у тым з ліку з былога СССР Латвія (срэбра і бронза), Казахстан (адно золата), Эстонія (срэбра), Грузія (срэбра), Расія (срэбра).
Усяго ўдзел у Гульнях бяруць 95 краін.
Сёння на Алімпіядзе будуць разыграныя медалі ў жаночай лыжнай гонцы на 50 км, бабслеі, кёрлінгу, хафпайпе фрыстайла і фінал хакейнага турніру ў мужчын.
Закрыццё Алімпіяды пачнецца ў 22:30 па Мінску.
Наступныя Зімовыя Алімпійскія гульні пройдуць у лютым 2030 года ў французскіх Альпах. Гэтыя будуць чацвёртыя Зімовыя гульні ў Францыі пачынаючы з 1924 года.
«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?2
Каментары