Мінская пенсіянерка заплаціла выкуп за «арабскага мільянера». Ён развёў яе двойчы
74‑гадовая жыхарка Першамайскага раёна сталіцы стала ахвярай шматсерыйнага махлярства, паверыўшы ў каханне і выкраданне замежнага багацея. Гісторыя пачалася пяць месяцаў таму, калі «мільянер з Эміратаў» паабяцаў жанчыне каштоўную пасылку.
Раней 74‑гадовая пенсіянерка ўжо звярталася ў Першамайскае РУУС Мінска. Віртуальны мільянер з Аб’яднаных Арабскіх Эміратаў нібыта даслаў пасылку з падарункам, каб яго атрымаць — жанчына заплаціла 7000 рублёў за дастаўку.
Пасля гэтага з ёй перасталі выходзіць на сувязь. Тады жанчына пайшла ў міліцыю.
Праз пяць месяцаў мужчына напісаў зноў.
Ён распавёў, што прыехаў у Беларусь і асабіста разбярэцца, чаму падарунак не быў дастаўлены, а выдаткаваныя грошы верне. Аднак неўзабаве сувязь з ім зноў перарвалася.
Пазней з мінчанкай звязаліся невядомыя, якія паведамілі, што яе знаёмага выкралі, і запатрабавалі выкуп — 5000 рублёў. Спужаўшыся за лёс каханага, пенсіянерка перавяла грошы на ўказаны рахунак.
Толькі праз некалькі дзён мінчанка ўсвядоміла, што зноў стала ахвярай махлярскай схемы, і паўторна звярнулася ў міліцыю.
Заведзена крымінальная справа.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары
[Зрэдагавана]