Да «Дажынак» у Калінкавічах мяняюць ружовую плітку на блакітную, а цана касмічная
У рамках падрыхтоўкі да абласнога фестывалю-кірмашу «Дажынкі‑2026» у Калінкавічах заняліся перакладкай тратуарнай пліткі, піша «Флагшток».
Плітку цалкам перакладваюць на плошчы Леніна перад адміністрацыйным будынкам райвыканкама. Працы не праводзіліся праз сэрвіс дзяржаўных закупак. Новая плітка будзе з арнаментам незвычайнага для гарадскога ўпарадкавання блакітнага колеру. Раней узор быў ружовым.
Пры гэтым на фота 2025 года не відаць асаблівых дэфектаў тратуарнага пакрыцця на плошчы — падстаў для рамонту і замены пліткі візуальна не назіралася.
Дакладны кошт гэтых работ невядомы, але па прыблізных разліках ён можа дасягаць 1 млн рублёў або прыкладна 300 тыс. даляраў. Плошча пліткавага пакрыцця складае каля 10 000 кв. м. Для дэмантажу старой пліткі і ўкладвання новага пакрыцця паводле эскізу згодна з расцэнкамі неабходна ад 800 тыс. да 1,1 млн рублёў.
І гэта пры тым, што амаль 3 млн рублёў (1 млн даляраў) ужо было ўкладзена ў цяперашні і капітальны рамонт будынка райвыканкама — згодна з апублікаванымі раней тэндарамі. Рамонт пакуль працягваецца, яго павінны скончыць якраз да «Дажынак».
Мяркуецца, што дэмантаваную з плошчы плітку аддадуць на ўпарадкаванне тэрыторый школ.
Цяпер чытаюць
Кобрынца, які застаўся без нагі пасля выбуху машыны, пасадзілі за кантакт з журналістамі. Пасля вызвалення ён расказаў сваю гісторыю1
Каментары