У Рагачове адкрылі новы вайсковы помнік з ужо пашкоджаным пастаментам
У Рагачове каля Замкавай гары адкрылі новы памятны знак, прысвечаны 63‑му стралковаму корпусу Чырвонай арміі, які ўдзельнічаў у баях на Дняпроўскім рубяжы ў 1941 годзе. Аднак ужо падчас урачыстай цырымоніі высветлілася, што пастамент помніка пачаў разбурацца, піша BG.Media.
Па сведчаннях відавочцаў, падмурак, выкладзены з бардзюрных камянёў, быў замацаваны неналежным чынам. У выніку асобныя элементы канструкцыі пачалі развальвацца практычна адразу пасля ўсталявання памятнага знака. Сам помнік уяўляе сабой вялікі валун з замацаванай на ім пластыкавай інфармацыйнай шыльдай.
Пра адкрыццё помніка паведамілі праўладная арганізацыя «Патрыёты Беларусі», Рагачоўскі райвыканкам і раённыя дзяржаўныя медыя. Мерапрыемства было прымеркавана да падзей лета 1941 года. У праграму адкрыцця ўвайшлі мітынг каля месца, дзе знаходзіўся штаб 63‑га стралковага корпуса пад камандаваннем генерал-лейтэнанта Леаніда Пятроўскага, адкрыццё памятнага знака корпусу, а таксама яшчэ аднаго памятнага знака самому Пятроўскаму.
Акрамя таго, адбыўся аўтапрабег «Дарогамі камкара: З 1941‑га ў будучыню». Яго маршрут прайшоў праз Рагачоў, Лучын, Лебядзёўку, Жлобін, Старую Рудню і завяршыўся зноў у Рагачове.
Пасля з'яўлення відэа з адкрыцця ў тыктоку многія карыстальнікі звярнулі ўвагу не на саму падзею, а на дрэнную якасць выкананых работ. У каментарыях адзначалася, што пастамент пачаў разбурацца яшчэ да заканчэння цырымоніі. Некаторыя карыстальнікі выказвалі меркаванне, што замест будаўніцтва такога помніка сродкі можна было б накіраваць на дапамогу ветэранам, былым вязням, рамонт жылля або забеспячэнне людзей дровамі.
Іншыя цікавіліся, колькі бюджэтных сродкаў было выдаткавана на стварэнне памятнага знака. Аднак на момант публікацыі мясцовыя ўлады і дзяржаўныя медыя не паведамілі кошт праекта.
Таксама афіцыйныя структуры пакуль не растлумачылі, чаму пастамент пачаў разбурацца адразу пасля ўсталявання і ці плануецца выпраўленне выяўленых недахопаў.
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»23
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары
Каб кожны год ставіць, зганяючы людзей на пабедабесную цырымонію.
Распіл бюджэта + пабедабесіе = нацыянальная ідэя, якая працуе 30 год, але акадэмікі баяцца сфармуляваць (бо фінансаванне адберуць)