U Rahačovie adkryli novy vajskovy pomnik z užo paškodžanym pastamientam
U Rahačovie kala Zamkavaj hary adkryli novy pamiatny znak, pryśviečany 63‑mu strałkovamu korpusu Čyrvonaj armii, jaki ŭdzielničaŭ u bajach na Dniaproŭskim rubiažy ŭ 1941 hodzie. Adnak užo padčas uračystaj cyrymonii vyśvietliłasia, što pastamient pomnika pačaŭ razburacca, piša BG.Media.
Pa śviedčańniach vidavočcaŭ, padmurak, vykładzieny z bardziurnych kamianioŭ, byŭ zamacavany nienaležnym čynam. U vyniku asobnyja elemienty kanstrukcyi pačali razvalvacca praktyčna adrazu paśla ŭstalavańnia pamiatnaha znaka. Sam pomnik ujaŭlaje saboj vialiki vałun z zamacavanaj na im płastykavaj infarmacyjnaj šyldaj.
Pra adkryćcio pomnika paviedamili praŭładnaja arhanizacyja «Patryjoty Biełarusi», Rahačoŭski rajvykankam i rajonnyja dziaržaŭnyja miedyja. Mierapryjemstva było prymierkavana da padziej leta 1941 hoda. U prahramu adkryćcia ŭvajšli mitynh kala miesca, dzie znachodziŭsia štab 63‑ha strałkovaha korpusa pad kamandavańniem hienierał-lejtenanta Leanida Piatroŭskaha, adkryćcio pamiatnaha znaka korpusu, a taksama jašče adnaho pamiatnaha znaka samomu Piatroŭskamu.
Akramia taho, adbyŭsia aŭtaprabieh «Darohami kamkara: Z 1941‑ha ŭ budučyniu». Jaho maršrut prajšoŭ praz Rahačoŭ, Łučyn, Lebiadzioŭku, Žłobin, Staruju Rudniu i zaviaršyŭsia znoŭ u Rahačovie.
Paśla źjaŭleńnia videa z adkryćcia ŭ tyktoku mnohija karystalniki źviarnuli ŭvahu nie na samu padzieju, a na drennuju jakaść vykananych rabot. U kamientaryjach adznačałasia, što pastamient pačaŭ razburacca jašče da zakančeńnia cyrymonii. Niekatoryja karystalniki vykazvali mierkavańnie, što zamiest budaŭnictva takoha pomnika srodki možna było b nakiravać na dapamohu vieteranam, byłym viaźniam, ramont žylla abo zabieśpiačeńnie ludziej drovami.
Inšyja cikavilisia, kolki biudžetnych srodkaŭ było vydatkavana na stvareńnie pamiatnaha znaka. Adnak na momant publikacyi miascovyja ŭłady i dziaržaŭnyja miedyja nie paviedamili košt prajekta.
Taksama aficyjnyja struktury pakul nie rastłumačyli, čamu pastamient pačaŭ razburacca adrazu paśla ŭstalavańnia i ci płanujecca vypraŭleńnie vyjaŭlenych niedachopaŭ.
Ciapier čytajuć
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie1
Kamientary
Kab kožny hod stavić, zhaniajučy ludziej na pabiedabiesnuju cyrymoniju.
Raśpił biudžeta + pabiedabiesije = nacyjanalnaja ideja, jakaja pracuje 30 hod, ale akademiki bajacca sfarmulavać (bo finansavańnie adbieruć)