У Беларусі ўздым захворванняў на грып чакаюць у канцы студзеня — пачатку лютага. Аднак сёлета ён можа пачацца раней. Пра гэта паведаміла начальніца аддзела гігіены, эпідэміялогіі і прафілактыкі Міністэрства аховы здароўя Іна Карабан.
Паводле слоў спецыялісткі, пакуль прагноз не адрозніваецца ад сітуацыі папярэдніх гадоў. Разам з тым у новым сезоне будуць цыркуляваць іншыя штамы віруса грыпу, якія ўключаныя ў склад вакцын, прапанаваных для жыхароў Беларусі.
Для вакцынацыі сёлета будуць выкарыстоўвацца прэпараты «Грыпол плюс», «Інфлювак Тэтра» і «Ваксігрып Тэтра», якія ўжываліся таксама летась.
У першую чаргу прышчапіцца рэкамендуюць дзецям ва ўзросце ад шасці месяцаў да трох гадоў, дзецям старэйшага ўзросту і дарослым з хранічнымі захворваннямі або імунадэфіцытнымі станамі, а таксама людзям ва ўзросце больш за 65 гадоў. Менавіта сярод гэтай катэгорыі часцей за ўсё сустракаюцца выпадкі шпіталізацыі з постгрыпознай пнеўманіяй.
Вакцынацыя таксама рэкамендаваная цяжарным жанчынам і прадстаўнікам асобных прафесійных груп. У іх лік уваходзяць медыцынскія і фармацэўтычныя работнікі, супрацоўнікі ўстаноў з кругласутачным рэжымам знаходжання і людзі, якія там жывуць, а таксама работнікі органаў дзяржаўнага кіравання, адказныя за бяспеку і жыццядзейнасць дзяржавы.
Іна Карабан падкрэсліла, што вакцынацыя з'яўляецца спецыфічным сродкам прафілактыкі, накіраваным перадусім на прадухіленне ўскладненняў пасля грыпу, а не толькі самога захворвання.
Паводле штогадовага маніторынгу, у стацыянары з ускладненнямі часцей трапляюць людзі, якія не былі прышчэпленыя супраць грыпу.
Цяпер чытаюць
Дэпутат Клішэвіч стаў кандыдатам гістарычных навук з дысертацыяй пра разлажэнне беларускага камсамола ў часы «перабудовы»2
Каментары