Мэханічнае размнажэньне чараўнікоў
Грувасткія і важныя дэкарацыі, эпоха тэхнікі і кацялкоў, тэатральная публіка, прагная да відовішчаў, патопленая дзяўчына – у кубе з вадою, электрычнасьць, эротыка...
Прэстыж (Prestige)
Вялікабрытанія – ЗША, 2006, каляровы, 128 хв
Рэжысэр: Крытафэр Нолан
Ролі выконваюць: Г’ю Джэкман, Крыстыян Бэйл, Майкл Кейн, Рэбэка Хол, Скарлет Ёхансан, Дэйвід Боўі
Жанр: Ілюзіянісцкая драма
Адзнака: 5,5 (з 10)
Напрыканцы 19 стагодзьдзя два лёнданскія ілюзіяністы (Г’ю Джэкман і Крыстыян Бэйл) вядуць зацятую барацьбу. Празь няшчасны выпадак загінула жонка аднаго зь іх, і цяпер магі зрываюць прадстаўленьні адзін аднаго, крадуць асабістыя дзёньнікі і пнуцца выведаць сакрэты чароўнай тэлепартацыі.
Грувасткія і важныя дэкарацыі, эпоха тэхнікі і кацялкоў, тэатральная публіка, прагная да відовішчаў, патопленая дзяўчына – у кубе з вадою, электрычнасьць, эротыка...
Менскія гледачы ўжо бачылі стужку “Ілюзіяніст” – пра закаханага мага на зломе стагодзьдзяў. “Прэстыж”, пры ўсёй павазе да Крыстафэра Нолана – “Ілюзіяністу” саступае.
У сур’ёзных дэкарацыях “Прэстыжу” зьнікае чароўная атмасфэра, губляецца цуд, а пачуцьці – барацьбы й нянавісьці – халодныя й амаль разьлічаныя. Г’ю Джэкман і Скарлет Ёхансан, якія складаюць дуэт у алэнаўскай “Сэнсацыі” – адбываюць “электрычны” нумар, дасканалы, выкшталцоны, празьмерны – і відовішчны.
Крыстафэр Нолан бярэ загадкамі й электратэхнікай. І галоўная загадка электратэхнікі – Дэйвід Боўі ў ролі тэхнамістыка Нікала Тэслы – з індуктарамі й маланкамі. Зроблены Тэслай прыбор – гарантуе цуды без усялякіх магічных фокусаў.
Вынікам тэхнацудаў стаецца агаломшаны глядач, дабіты падстаноўкамі з падваеньнямі. Тайна “Прэстыжу” нечаканая, сур’ёзная і вельмі важная.
Але не пакідае ўражаньне, што гэта мэханічнае размнажэньне чараўнікоў.
Глядзі таксама: Намінанты на "Оскара" за 2006 г.
Цяпер чытаюць
Сусветная зорка Джэйсан Дэрула заехаў у Беларусь. Прэм’ер Турчын вадзіў яго па Доме ўрада8
Каментары