«Čakłun i Rumba»
Karcina Andreja Hołubieva “Čakłun i Rumba” – heta “Vyratavańnie žaŭniera Rajana”, źniataje ćviordaj rukoj Eda Vuda.
ČAKŁUN I RUMBA (Čakłun i Rumba)
Biełaruś – Rasieja, 2007, kalarovy, 85 chv.
Režyser: Andrej Hołubieŭ
Roli vykonvajuć: Andrej Fiadorcaŭ, Volha Repuch, Alaksiej Šadźko, Ihar Vasiljeŭ, Julija Pałubinskaja, Andrej Hołubieŭ, Alaksandar Kašpieraŭ, Mikałaj Čyndziajkin, Uładzimier Mišančuk, Zoja Biełachvościk
Žanr: Vajskovy “naparnicki” film pavodle kinaapovieści Jaŭhiena Anapryjenki
Festy: Premjera na MKF "Listapad"
Adznaka: 2 (z 10)
Sapior Čakłun i jahonaja aŭčarka Rumba zmahajucca z voraham na vajnie…
Tannyja vajskovyja dekaracyi, bieznadziejna sastareły siužet, ekshumavany z časopisa “Kinascenaryi” 20-hadovaj daŭniny, radyjorupar sa stalovym maskoŭskim hołasam – i jašče adna stužka na kinaśmietnicy.
Debiutnaja karcina Andreja Hołubieva “Čakłun i Rumba” – heta “Vyratavańnie žaŭniera Rajana”, źniataje ćviordaj rukoj Eda Vuda. Ale “najhoršy režyser usich časoŭ” kusaŭ by łokci ad zajzdraści. U biełaruskaj stužcy pamierłyja dryhajucca ŭ takt kardonavym dekaracyjam, zality kryvioju chirurh viadzie filazofskija hutarki, u suviazistak abaviazkovyja hołyja nožki, a aperatar tak zdymaje hałoŭnuju pryhažuniu – što bačnyja ŭsie pryščy j zmorščynki, pisiahi pad vačyma pamieram z talerku, a tvar siniušny-siniušny…
Da taho ž Čakłun upryhožvaje lubuju aŭčarku halinkami (!), kupajecca z maładzieńkim žaŭnieram... Hiendernyja daśledčycy EHU musiać zachłynucca ad ščaścia, ale Andrej Hołubieŭ prosta kirujecca kalanijalnaj linii. Filmy Biełarusi pavinny być błahimi i pravincyjnymi. Jašče ŭ dyplomie “Kazanova”, jaki nia byŭ takim kiepskim, hałoŭnyja hieroi – žaŭniery, miascovyja žychary – tak, dziela ekzotyki.
U “Čakłunie i Rumbie” – hałoŭnaja rola – aktoru rasiejskamu, biełaruskija vykanaŭcy Zoja Biełachvościk i Ŭładzimier Mišančuk – na epizodach. Chrypić i davicca radyjorupar: “Havoryć Maskva! Havoryć…”
Kašlaje niedaroblenaja da premjery stužka, niasuć štrafbataŭcy damaviny-łodki, kryčać ad ščaścia padstrelenyja.
Chaču hetuju trešuchu sabie ŭ kalekcyju!
Dy tolki kamu hetaje dabro treba?
Ciapier čytajuć
«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy11
Kamientary