Polšča ŭniesła biełaruskaha dalnabojščyka ŭ śpis niepažadanych zamiežnikaŭ. Jon navat pisaŭ prezidentu krainy

Kala hoda Siarhiej jeździŭ u rejsy i nie padazravaŭ, što znachodzicca ŭ śpisie niepažadanych zamiežnikaŭ. Jon daviedaŭsia pra heta tolki tady, kali vyrašyŭ źmianić pracu. Jamu pahražała departacyja z Polščy ŭ Biełaruś, ale viarnucca na radzimu jon nie moh z-za palityčnaha pieraśledu. Siarhiej raskazaŭ Most, čym skončyłasia hetaja historyja.

U pačatku 2021 hoda Siarhiej prylacieŭ u Polšču pracavać kiroŭcam-mižnarodnikam. Tady z-za pandemii ŭ krainie dziejničali karancinnyja praviły.

Padčas kantrolu ŭ aeraporcie Siarhieju zadali pytańnie pra karancin, ale kaleha skazaŭ, što dla dalnabojščykaŭ jon nie patrebny. Siarhiej miarkuje, što supracoŭnik adznačyŭ u sistemie, što ŭ jaho jość miesca dla adbyvańnia karancinu.

Pryjechaŭšy ŭ kampaniju, dzie źbiraŭsia pracavać, Siarhiej aformiŭ dakumienty. Da pieršaha rejsa jašče byŭ zapas času, i jon adpraviŭsia ŭ Biełaruś. Ale kali vyjazdžaŭ z Polščy, na miažy jamu paviedamili, što jon parušyŭ karancin.

Siarhiej adrazu zapłaciŭ štraf — kala 50 dalaraŭ — i ličyŭ pytańnie zakrytym. A viarnuŭšysia ŭ Polšču, prystupiŭ da pracy.

Prablemy ŭźnikli praz hod, kali jon vyrašyŭ źmianić pracu. Tady vyśvietliłasia, što z-za parušeńnia karancinu biełarusa ŭnieśli ŭ śpis zamiežnikaŭ, znachodžańnie jakich u Polščy niepažadanaje, i ŭ Šenhienskuju infarmacyjnuju sistemu (SIS). A polskija ŭłady pačali praceduru anulavańnia dazvołu na žycharstva.

Tady Siarhiej źviarnuŭsia da jurystaŭ, i tyja padali ŭ sud zajavu, kab abskardzić rašeńnie pra ŭniasieńnie ŭ SIS. Jurysty patłumačyli mužčynu, što pakul sprava razhladajecca, jon moža lehalna znachodzicca ŭ Polščy.

— Ale vyjazdžać za jaje miežy ja nie moh. Tamu mnie daviałosia syści ź firmy, dzie ja pracavaŭ dalnabojščykam, i ŭładkavacca ŭ miascovuju aŭtamajsterniu,— kaža jon.

U liście prezidentu napisaŭ: pra karancin nie viedaŭ, štraf za jaho parušeńnie zapłaciŭ

Pakul sprava razhladałasia ŭ sudzie, Siarhiej napisaŭ list tahačasnamu prezidentu Polščy Andžeju Dudu i paprasiŭ umiašacca ŭ situacyju. U liście jon padrabiazna patłumačyŭ, čamu ličyć dziejańni čynoŭnikaŭ niepravamiernymi.

— Ja apisaŭ usio jak jość: pra karancin nie viedaŭ, štraf za jaho parušeńnie zapłaciŭ,— raskazvaje jon.

Nieŭzabavie ź Siarhiejem źviazalisia z kancylaryi prezidenta. Tam patłumačyli, što zvarot pieradaduć u palicyju pa miescy žycharstva, i jana budzie raźbiracca.

Adnačasova Siarhiej źviarnuŭsia ŭ ofis Śviatłany Cichanoŭskaj — paprasiŭ razabracca ŭ situacyi i patłumačyŭ, što ŭ vypadku departacyi ŭ Biełaruś jamu pahražaje palityčny pieraśled: razam z žonkaj jon udzielničaŭ u pratestach, da ich dadomu prychodzili milicyjaniery i papiaredžvali pra adkaznaść za ekstremizm.

«Ja nie viedaju, što adyhrała svaju rolu»

Tady ž palicyja Biełastoka pačała pravierku ŭ dačynieńni da Siarhieja. Apytali jaho žonku.

— Ja sam źviazaŭsia ź imi i prapanavaŭ pryjechać u adździaleńnie, kab jany asabista pierakanalisia, što ja narmalny čałaviek: pracuju i ničoha nie parušaju. Ale mnie skazali, što ŭ hetym niama patreby, što heta prosta hutarka z palicyjaj, — uspaminaje mužčyna.

U sudovych pasiadžeńniach jon asabista nie ŭdzielničaŭ: jaho pradstaŭlaŭ juryst pa davieranaści.

Pakul išli pracedury pa spravie, u krasaviku 2024 hoda skončyŭsia termin zabarony na ŭjezd u Šenhienskuju zonu. Kab pierakanacca, što zapisu bolš niama ŭ SIS, Siarhiej adpraviŭ zapyt u kampietentny orhan Hałoŭnaha praŭleńnia palicyi ŭ Varšavie. I atrymaŭ adkaz: zabarona źniataja.

Paralelna jon padaŭ dakumienty na novy časovy vid na žycharstva na padstavie pracy ŭ aŭtamajsterni. A kali skončyŭsia termin zabarony, znoŭ znajšoŭ pracu ŭ transpartnaj kampanii i prykłaŭ adpaviedny dakumient da svajoj zajavy na DNŽ. U listapadzie 2024 hoda mužčyna atrymaŭ novuju kartu pobytu.

— Ja nie viedaju, što adyhrała svaju rolu: praca jurysta, list prezidentu ci toje, što termin zabarony prosta skončyŭsia. Ale ŭ vyniku ja zmoh viarnucca da pracy dalnabojščykam i atrymać na padstavie pracy novy dazvoł na žycharstva,— kaža Siarhiej.

• 7
• 0
• 0
• 0
• 0
• 0
• 0
• 1