Statkievič: Sapraŭdnaja meta vajny va Ukrainie — likvidacyja ŭkraincaŭ jak nacyi
Eks-palitviazień u svaim telehram-kanale razvažaje pra rasijska-ŭkrainskuju vajnu, jaje pryčyny i nastupstvy.
«Rasijska-ŭkrainskaja vajna idzie ŭžo piaty hod. Niahledziačy na pieramožnyja dy supraćlehłyja relacyi bakoŭ, u suchoj rešcie — Rasija dahetul nie zdoleła zachapić navat uvieś Danbas. Nievialikaja niezachoplenaja častka hetaj razburanaj terytoryi čamuści abvieščana prapahandaj Maskvy ledź nie hałoŭnaj metaj vajny, dasiahnieńnie jakoj budzie ličycca jaje pieramohaj.
Treba adznačyć, što zajaŭlenyja Kramlom mety vajny nieadnarazova źmianialisia. Spačatku heta było spynieńnie prasoŭvańnia «złaviesnaha NATA» da rasijskich miežaŭ. Ale, paśla dałučeńnia da «pahroźlivaha» błoku Finlandyi dy Šviecyi, jakoje nie paciahnuła za saboj zaŭvažnaj reakcyi RF, pahroza dałučeńnia da NATA Ukrainy ŭ rasijskaj prapahandzie niejak adyšła na druhi płan.
Kali toje NATA ŭžo pad Picieram, to kazać pra vajnu za praduchileńnie pahrozy jaho prasoŭvańnia pad Kursk niejak užo paznavata. Tolki nahadać paddanym, što jano ŭžo nabliziłasia «pa samaje nie mahu». Tamu ciapier aficyjnaja meta vajny dla Kramla — zachop rešty terytoryi šmatpakutnaha Danbasa.
Dziela hetaj «vialikaj» mety Kreml admaŭlajecca ad spynieńnia ahniu, vyrakaje na pakuty i śmierć sotni tysiač rasijan i ŭkraincaŭ, achviaruje ŭłasnaj ekanomikaj i budučyniaj svajoj krainy. Niepaźbiežna ŭźnikaje pytańnie, a dziela čaho ŭsio heta, dziela čaho vajna i straty?
Dziela «narodaŭ DNR i ŁNR»? Dyk ich da 2022 hoda i biez vajny možna było abjavić «subjektami RF». Ukraina naŭrad ci pačała b z-za hetych, što ŭžo adkałolisia, terytoryj vajnu z Rasijaj. Prykład anieksii Kryma heta pakazaŭ. Pratesty i sankcyi Zachadu? U lubym vypadku, mienšyja, čym zaraz.
Dyk čamu ciapier nievialikaje pavieličeńnie terytoryj tych «DNR i ŁNR» zrabiłasia nastolki važnym, što Kreml ledź nie hatovy pačać z-za ich jadziernuju vajnu?
Padajecca, što heta chłuślivaja meta. Ale jana abjaŭlenaja, šmat razoŭ paŭtoranaja dy ŭbita ŭ hałovy prapahandaj i ciapier admova ad jaje moža być uspryniataja rasijanami jak paraza.
Užo tut, što sapraŭdnaja meta vajny inšaja, i taksama zasnavana na chłuśni.
Heta meta — źniščeńnie ŭkrainskaj dziaržavy i nacyi. Niekali, kab pazbycca pamiaci pra haniebnyja stahodździ manholskaha rabstva dy atrymać pravy na Ukrainu i Biełaruś, Maskva nachabna prysvoiła sabie historyju sučasnych ukraincaŭ, abviaściła jaje svajoj.
Tak, sapraŭdy, niekali značnyja terytoryi sučasnaj Rasii padparadkavalisia Kijevu. Ale abjaŭlać siabie z-za hetaha sapraŭdnymi ŭładalnikami Ukrainy dy jaje staradaŭniaj i słavutaj historyi — nachabna chłusić. Heta, jak by prezident ZŠA abviaściŭ Vialikabrytaniju i Francyju amierykanskimi terytoryjami, bo niekali hetyja krainy vałodali ziemlami na terytoryi sučasnych ZŠA. Chacia, zaraz takija časy, što i takoje moža zdarycca.
Histaryčnaja chłuśnia, niekali padmacavanaja stratehična pravalnym vybaram Bahdana Chmialnickaha, stała asnovaj rasijskaha histaryčnaha mifa, apiryščam nacyjanalnaj samaśviadomaści rasijanaŭ.
Ale źjaŭleńnie va ŭkraincaŭ svajoj dziaržavy, ich zakonnyja pretenzii na ŭłasnuju historyju, nanieśli mocny ŭdar pa nacyjanalnaj samapavazie rasijan. Tamu samo isnavańnie ŭkrainskaj nacyi było abvieščanaje prajavaj «nacyzmu». I rasijskaja hramadskaja dumka padtrymała sapraŭdnuju metu vajny — likvidacyju ŭkraincaŭ jak nacyi.
Ciapier, kali heta nacyja, u vačach usiaho śvietu i rasijan, u tym liku, dakazała svajo prava na isnavańnie, i, takim čynam, na svaju staradaŭniuju historyju, u Kramla ŭźnik jašče adzin matyŭ da praciahvańnia vajny — strach pomsty ŭkraincaŭ za zroblenaje ich narodu i krainie.
Darečy, Kreml užo zrabiŭ sproby stvareńnia novaha histaryčnaha mifa dla svaich paddanych. Pabudova kala Sievastopala novaj «śviatyni» zamiest užo razbomblenaj im Kijeva-Piačerskaj Łaŭry — z hetaj sieryi.
Uličvajučy, jakija prablemy ŭtvarajuć rehijonu i śvietu hetyja sproby Maskvy ŭzbrojenym čynam uratavać svoj falšyvy histaryčny mif, mušu dapamahčy ŭschodnim susiedziam znajści novy. Parada — šukajcie va ŭłasnaj realnaj historyi dy na svajoj ziamli.
Biarycie prykład ź biełarusaŭ. My nie pretendujem na čužoje. Hruntujemsia na svaim. Chaj historyja Połackaha kniastva krychu paźniejšaja za Kijeŭskaje i było jano nienadoŭha (našy historyki kažuć pra 70 hadoŭ ahułam) padparadkavana Kijevu, ale ž, zatoje, svajo. I daje nam niesumniennaje prava vieści ad jaho historyju svajoj dziaržaŭnaści.
Bolej za tysiaču hod — heta niamała.
Mahu kankretyzavać svaju paradu — pryhledźciesia da svajoj historyi. Nie, ja nie pra vyrazany maskoŭcami volny Noŭharad sa svajoj admietnaj movaj. Voś Uładzimira-Suzdalskaje kniastva — biassprečna vaša. Staradaŭniaje, u peŭny čas padniałosia vyšej za Kijeŭ. Ź vielmi centralizavanaj, jak i ciapier u vas, uładaj. Nie kažučy ŭžo pra sapraŭdy staradaŭnija dy pryhožyja chramy.
Dziakavać za paradu nie treba. Tolki pierastańcie leźci da susiedziaŭ sa svaim «tryadzinym», jakoha nikoli nie było, «narodam». Nam vašy falšyvyja mify vielmi doraha kaštavali raniej i kaštujuć ciapier. Vam, dumaju, taksama nie mała. Zajmiciesia lepiej uładkavańniem ułasnaha žyćcia i zachavańniem ułasnaj terytoryi», — reziumavaŭ Mikałaj Statkievič.
Kamientary