Rasijski žurnalist, aŭtar artykuła pra Ułada Kaleśnikava: «U mianie brat u Minsku ŭ KDB pa achovie kanstytucyi słužyć»
Žurnalist «Komsomolskoj pravdy» Alaksandr Hryšyn, aŭtar artykuła pra 17-hadovaha Ułada Kaleśnikava, pieršaha ŭ łancužku ckavańnia, jakoje pryviało da samahubstva chłopca, nieardynarna adhuknuŭsia na chvalu krytyki ŭ sacyjalnych sietkach na svoj adras.
«U mianie brat u Minsku ŭ KDB pa achovie kanstytucyi słužyć. Ja jamu vašy akaŭnty zaraz pašlu», — napisaŭ maskoŭski žurnalist u svaim tvitary. Taki zapis vyklikaŭ novuju chvalu śmiechu, hnievu i niecenzurnych vykazvańniaŭ na jahony adras.
U Rasii 18-hadovy Uład Kaleśnikaŭ na dniach pakončyŭ z saboj, bo jaho ckavali i pieraśledavali za praŭkrainskuju pazicyju. Kaleśnikaŭ vioŭ staronki ŭ internecie, dzie rezka krytykavaŭ rasijskuju realnaść i nastroi ŭ hramadstvie.
Chłopiec byŭ ranimy i ŭraźlivy, jak mnohija padletki. Jaho baćki byli ŭ razvodzie i mała zajmalisia synam, addali na vychavańnie babie ź dziedam. A dzied-pucinist, imavierna, były KHBist, staŭ chłopca łamać. Dajšoŭ da «Komsomolskaj pravdy», kab raskazać pra toje, jaki ŭnuk kiepski. Heta nahadvała sproby adchryścicca ad svajakoŭ, «vorahaŭ naroda», u stalinski čas.
U vyniku «Komsomołka» apublikavała artykuł, u jakim prymityŭna vyśmiejvała Ułada — jahony vyhlad, vahu, fakty bijahrafii, śćviardžała, što Uład byŭ «pradmietam kpinaŭ jak chłopcaŭ, tak i dziaŭčatak». Vybrała dla ilustracyi samyja niepryvabnyja fotazdymki.
«Pikantnyja padrabiaznaści, tak, hnidy?! — piša na adras žurnalistaŭ «Komsomołki» ŭ svaim fejsbuku biełaruska, zorka telekłuba «Što? Dzie? Kali?» Darja Kastenka. — Viedajučy, što havorka idzie pra niepaŭnaletniaha, «Kamsamołka» publikuje sapraŭdnaje proźvišča Ułada, nazyvaje horad, dzie jon žyvie, i navučalnuju ŭstanovu. A kab adnakurśniki jašče i viedali abjekt hanieńnia ŭ tvar, publikuje jaho fota. Fota padletka, 17-hadovaha chłopčyka. U internecie padobnym čynam dziejničajuć tolki troli, olhinskaja biazmozhaja batva pa tryccać tysiač za pučok».
Ciapier čytajuć
Łukašenka zajaviŭ pra hatoŭnaść pryjechać u Kijeŭ85
Kamientary