Lekcyja Alaksieja Łastoŭskaha «Biełaruś na piŭnoj mapie śvietu» — 16 červienia ŭ Viciebsku

Zaŭtra ŭ Viciebsku projdzie lekcyja Alaksieja Łastoŭskaha — biełaruskaha navukoŭca, kandydata sacyjałahičnych navuk i, adnačasova, samaha daśviedčanaha ŭ Biełarusi dehustatara piva. Apošniamu zachapleńniu i budzie pryśviečanaja sustreča.

Pavialičyć

Pavodle Untapped — sacyjalnaj sietki, jakaja abjadnoŭvaje piŭnych amataraŭ usiaho śvietu, — za dva hady Alaksieju ŭdałosia pakaštavać bolš za 4000 hatunkaŭ piva. Heta samaja vialikaja ličba jak u Biełarusi, tak i ŭ krainach SND. Napiaredadni lekcyi «Narodnyja naviny Viciebska» źviazalisia z vystupoŭcam, kab daviedacca, što čakaje naviednikaŭ «Torvalda» 16 červienia.

— Ty šmat vystupaješ z temaj brovarstva, jość tvaje intervju ŭ presie, možna pahladzieć videazapisy. Ci budzie na prezientacyi ŭ «Torvaldzie» niejkaja novaja śpiecyfičnaja infarmacyja, jakuju ty padrychtavaŭ mienavita dla viciebskich naviednikaŭ?

— Naturalna, infarmacyja budzie novaja, bo va ŭsich vystupach ja adkazvaŭ na pytańni, a tut źjaviłasia mahčymaść raspaviadać samomu. Bolš padrabiazna, detalova, z dadatkovymi ilustracyjami i videašeraham. U Viciebsku my bolš hłyboka pasprabujem razabracca, što adbyvajecca z kulturaj brovarstva i kulturaj spažyvańnia piva.

— U Biełarusi?

— Tak. Chacia treba razumieć, što naša kraina žyvie nie izalavanaj ad astatniaha śvietu. I, adpaviedna naźvie lekcyi, heta budzie sproba raźmieścić Biełaruś na suśvietnaj mapie brovarstva.

— Davaj ujavim asobu, jakaja b chacieła ŭzbahacić svoj piŭny dośvied i paznajomicca ź jak maha bolšym šeraham smakaŭ i hatunkaŭ za abmiežavany čas. Jakuju b krainu ty paraiŭ dla naviedvańnia?

— Samy prosty i elemientarny šlach — heta pajezdka ŭ Polšču. Navat daloka ad miažy možna nie jechać, Biełastok albo Varšava dapamohuć akunucca ŭ akijan hatunkaŭ. Niedzie čatyry hady nazad tam adbyłasia sapraŭdnaja revalucyja kraftavaha piva, źjaviłasia mnostva brovaraŭ, novych hatunkaŭ, baraŭ. Pryčym, niekatoryja brovary pa svajoj jakaści nabyli jeŭrapiejskuju ci navat suśvietnuju viadomaść. Tamu Polšča — heta samy prosty i blizki šlach. Kali paŭstaje vizavaje pytańnie, to šmat čaho adbyvajecca i ŭ susiedniaj Rasii.

— A što pieraškadžaje «kraftavaj revalucyi» u Biełarusi?

— Pa-pieršaje ŭ nas pačatkovyja ŭmovy byli nie takimi spryjalnymi, jak u Polščy. Pa-druhoje, dosyć šmat dziaržaŭnych rehłamientacyj. Składaniej razharnucca mienavita drobnym brovaram, bo patrebnaje licenzavańnie i inšyja padobnyja rečy, jakija niaprosta pieraadolvajucca. Tamu pakul što, kali kazać pra Minsk, my pieravažna raźvivajemsia ŭ formie chatniaha pivavareńnia, kali piva robicca nie na prodaž, a dla svaich patrebaŭ. Maksimum — pačastavać siabroŭ. Heta nie patrabuje niejkaha zakanadaŭčaha afarmleńnia. Chacia byli vyklučnyja vypadki, kali chatnija brovary pierachodzili na bolš-mienš pramysłovy ŭzrovień. I apošniaje, što istotna, Biełaruś startavała paźniej i bolš pavolna. Ale ahulnyja tendencyi raźvivajucca i ŭ nas. Novyja hatunki, novyja brovary — usio heta pastupova pranikaje i ŭ našu biełaruskuju rečaisnaść.

***

Lekcyja-prezientacyja «Biełaruś na piŭnoj mapie śvietu» projdzie ŭ čaćvier 16 červienia ŭ art-pabie «Torvald». Pačatak a 18-j hadzinie. Košt uvachodu: 30,000 rubloŭ, na jakija možna atrymać pradukcyju paba (ček-bar).

• 0
• 0
• 0
• 0
• 0
• 0
• 0
• 0