Rubia zajaviŭ, što Kuba pahroza dla ZŠA, Havana abvinavaciła jaho ŭ chłuśni

Jaho vykazvańni prahučali ŭsiaho praź dzień paśla taho, jak ZŠA vystavili byłomu prezidentu Kuby Raulu Kastra abvinavačańnie ŭ zabojstvie ŭ suviazi sa źbićciom dvuch samalotaŭ u 1996 hodzie, u vyniku jakoha zahinuli hramadzianie ZŠA.

Rubia zajaviŭ, što Vašynhton addaje pieravahu «dypłamatyčnamu rašeńniu», ale papiaredziŭ, što prezident Donald Tramp maje prava i abaviazak abaraniać svaju krainu ad luboj pahrozy.

Ministr zamiežnych spraŭ Kuby Bruna Radryhies abvinavaciŭ Rubia ŭ «chłuśni» i zajaviŭ, što vostraŭ nikoli nie ŭjaŭlaŭ pahrozy dla ZŠA.

U čaćvier, vystupajučy pierad žurnalistami, Rubia zajaviŭ, što dypłamatyja pa-raniejšamu zastajecca najbolš vierahodnm rašeńniem u adnosinach z Kubaj, ale dadaŭ: «Ščyra kažučy, vierahodnaść hetaha, uličvajučy, z kim my zaraz majem spravu, nievialikaja».

Jon taksama abvinavaciŭ Kubu ŭ tym, što jana źjaŭlajecca «adnym ź viadučych sponsaraŭ teraryzmu va ŭsim rehijonie», što Radryhies kateharyčna abvierh u svaim paście ŭ X.

Ministr zamiežnych spraŭ Kuby raskrytykavaŭ Rubia za sprobu «spravakavać vajennuju ahresiju» i abvinavaciŭ urad ZŠA ŭ «biaźlitasnych i sistematyčnych» atakach na jaho krainu.

Kuba pakutuje ad paliŭnaha kryzisu, jaki pahoršyła naftavaja błakada ZŠA, i znachodzicca pad ciskam administracyi Trampa z patrabavańniem zaklučyć ździełku.

U apošnija niekalki miesiacaŭ hramadzianie krainy adčuvajuć praciahłyja adklučeńni elektraenierhii i niedachop charčavańnia.

Rubia zajaviŭ, što kraina pryniała prapanovu ZŠA ab pradastaŭleńni humanitarnaj dapamohi ŭ pamiery 100 miljonaŭ dołaraŭ.

Tramp nieadnarazova sprabavaŭ akazać cisk na Kubu i adkryta abmiarkoŭvaŭ źviaržeńnie jaje kamunistyčnaha režymu.

Abvinavačańni, vystaŭlenyja byłomu kubinskamu prezidentu ŭ sieradu, šmat kamu nahadali historyju z zachopam amierykancami prezidenta Vieniesueły Nikałasa Madura ŭ studzieni.

Na pytańnie žurnalistaŭ ab tym, ci źbirajecca jaho ŭrad — i jak — dastavić Kastra ŭ ZŠA dla vystaŭleńnia abvinavačańniaŭ, Rubia adkazaŭ: «Ja nie źbirajusia kazać pra toje, jak my źbirajemsia dastavić jaho siudy. Kali b my sprabavali dastavić jaho siudy, navošta b ja staŭ raskazvać presie ab našych płanach?».

V.a. hienieralnaha prakurora Tod Błanš zajaviŭ, što ZŠA «čakajuć, što jon źjavicca tut, pa ŭłasnaj voli ci inšym čynam».

Aryšt Adys Łastres Marery

Paźniej dziaržsakratar ZŠA abviaściŭ pra aryšt siastry kiraŭnika kubinskaha finansavaha kanhłamieratu GAESA Adys Łastres Marery.

«Marera kiravała nieruchomaściu i žyła ŭ Fłarydzie, adnačasova dapamahajučy kamunistyčnamu režymu Havany, pakul ja nie pazbaviŭ jaje statusu pastajannaha žychara. Ja rady paviedamić, što siońnia jana była aryštavanaja i zaraz znachodzicca pad vartaj u imihracyjnaj i mytnaj słužbie ZŠA», — napisaŭ Rubia ŭ X.

Jon adznačyŭ, što GAESA — finansavy kanhłamierat, jaki kantralujuć kubinskija vajskoŭcy.

Ministerstva finansaŭ ZŠA ŭ 2020 hodzie ŭviało sankcyi ŭ adnosinach da kubinskaha hienierała Łuisa Albierta Radryhiesa Łopiesa-Kaljechi, ziacia byłoha kiraŭnika krainy Raula Kastra i kiraŭnika GAESA.

U kansorcyum uvachodziać kala 50 haścinic, sietkavyja kramy i budaŭničyja pradpryjemstvy. GAESA taksama kantraluje bujny port Maryel, jaki znachodzicca na zachad ad Havany.

Raniej, vystupajučy pierad žurnalistami ŭ Avalnym kabiniecie, Tramp zajaviŭ, što Kuba — «niedziejazdolnaja kraina», i što jaho administracyja sprabuje dapamahčy im «na humanitarnaj asnovie».

Jon skazaŭ, što amierykancy kubinskaha pachodžańnia «chočuć viarnucca ŭ svaju krainu» i dapamahčy Kubie damahčysia pośpiechu.

«Inšyja prezidenty razhladali hetaje pytańnie 50‑60 hadoŭ i niešta pradprymali, i, zdajecca, ja budu tym, chto heta zrobić, tamu ja z zadavalnieńniem heta zrablu», — skazaŭ Tramp.

• 0
• 0
• 0
• 0
• 0
• 0
• 1
• 0