Vydru ŭ ZŠA navučyli šukać i znachodzić uliki

Kali havorka zachodzić pra žyvioł-vyratavalnikaŭ, bolšaść ludziej ujaŭlaje sabie sabak. Ale ŭ hetych niezamiennych pamočnikaŭ jość surjoznaje abmiežavańnie: jany nie mohuć doŭha pracavać u vadzie. Tamu fłarydskaja słužba Peace River K9 Search and Rescue vyrašyła zadziejničać dla hetaj zadačy račnuju vydru.

Pieršym «vypusknikom» staŭ Spłeš — dvuchhadovaje azijackaje małakipciuraje vydrania. Heta samy maleńki vid vydraŭ, jaki adroźnivajecca sprytnymi łapami i vysokim intelektam.

Pavialičyć

Žyviołu treniravaŭ 46‑hadovy Majkł Chandseł, kiraŭnik pošukava-vyratavalnaj słužby, jaki raniej pracavaŭ z sabakami i końmi. Padčas pieralotu z Łos-Andželesa jon pračytaŭ artykuł pra vydraŭ i daviedaŭsia, što jany zdolnyja aryjentavacca pad vadoj pa pachu, vykarystoŭvajučy niuch i vibrysy, a taksama mohuć zatrymlivać dychańnie da piaci chvilin. Tak naradziłasia ideja «padvodnaha vyratavalnika».

Spačatku Majkł naziraŭ za pracaj dresiroŭščykaŭ z vydrami i zrazumieŭ, što mietodyka šmat u čym nahadvaje navučańnie sabak. Zatym jon pačaŭ treniroŭki va ŭłasnym basiejnie: chavaŭ u im pradmiet z zadadzienym pacham, nanosiŭ toj ža pach na miačyk na kancy pałki i davaŭ sihnał.

Užo praz čatyry miesiacy Spłeš navučyŭsia biez pamyłak znachodzić cel, ale adpracoŭka navykaŭ praciahvajecca dahetul. Znajšoŭšy krynicu pachu, vydrania padaje sihnał nastaŭnikam, jakija niaredka nyrajuć razam ź im.

«Jon padpłyvaje i pačynaje chapać mianie za masku, pakazvajučy, što niešta znajšoŭ, i nie adpuskaje, pakul ja nie pačnu ruchacca napierad».

Asnoŭnaja zadača žyvioły — pošuk i vyjaŭleńnie, a nie niepasrednaje vyratavańnie, ale jaho praca nadzvyčaj važnaja dla ludziej, jakija stracili blizkich i sprabujuć atrymać choć niejkaje suciašeńnie.

Pavialičyć

Maleńki vyratavalnik dapamoh znajści zbroju, vykarystanuju pry zabojstvie 25‑hadovaj daŭniny, i vyjavić čałaviečuju DNK na hlinianaj cehle na dnie voziera. U jahonym aktyvie ŭžo kala 20 pošukava-vyratavalnych apieracyj.

Za paśpiachovaje vykanańnie zadańnia jon atrymlivaje kavałak łasosia. «I abaviazkova fiermierskaha. Dzikaha nie jeść», — pažartavaŭ Majkł Chandseł.

Biaśpieka padapiečnaha zastajecca pryjarytetam. Vydra moža pracavać jak u presnaj, tak i ŭ salonaj vadzie, ale jaje nie dapuskajuć hłybiej za dzieviać mietraŭ, navat kali vada kryštalova čystaja. Taksama ŭličvajucca mocnaja płyń i ryzyka sustrečy z drapiežnikami, naprykład, z alihatarami.

Pavialičyć

«Pošuki pavinny adpaviadać kryteram dla vykarystańnia vydry, inakš my prosta nie budziem jaje zadziejničać», — padkreśliŭ Majkł Chandseł.

Niahledziačy na svavolny charaktar, padvodny pamočnik staŭ ulubioncam kamandy Peace River K9 Search and Rescue i pracuje pobač z pošukava-vyratavalnymi sabakami, u tym liku sa svaim najlepšym siabram pa mianušcy Nova.

• 5
• 0
• 0
• 0
• 0
• 0
• 0
• 3