Projduć i inšyja ŭračystaści da 150-hodździa «Pinskaj šlachty».
Sioleta — 150-ja hadavina z času napisańnia słynnaj kamiedyi «Pinskaja šlachta» Vincenta Dunina-Marcinkieviča.
Pjesa była napisanaja ŭ Lucincy na Vałožynščynie ŭ 1866 hodzie, paśla bolš čym hadavoha źniavoleńnia aŭtara ŭ mienskim Piščałaŭskim zamku.
150-hadovamu jubileju pryśviečanaje ŭnikalnaje vydańnie kamiedyi na 5-ci movach: aproč «paleskaha» aŭtentyku i biełaruskaj adaptacyi ŭ knizie padadzienyja pierakłady na anhlijskuju, niamieckuju, polskuju, rasiejskuju movy.
Układalnik vydańnia Jazep Januškievič na jubilejny pakaz kamiedyi «Pinskaja šlachta» 29 červienia zaprasiŭ naščadkaŭ dramaturha. Nahadajem, znakamity tvor u pastanoŭcy režysiora Mikałaja Pinihina nie sychodzić z Kupałaŭskich teatralnych padmostkaŭ ad 2008.
Naohuł, 29 červienia prahrama śviatkavańnia praduhledžvaje:
12:00 — imša ŭ kaściole Śviatoha Rocha (na Załatoj Horcy) za Vincenta Dunina-Marcinkieviča i jahonych naščadkaŭ;
16:00 — karotkaja ŭračystaść u Nacyjanalnaj biblijatecy, dzie vystupić praprapraŭnučka kłasika novaj biełaruskaj litaratury Ahnieška Kryžańska-Duś;
19:00 — jubilejnaja pastanoŭka kamiedyi «Pinskaja šlachta» na scenie Nacyjanalnaha akademičnaha teatra imia Janki Kupały (z karotkim vitalnym słovam hałoŭnaha režysiora i pastanoŭščyka Mikoły Pinihina).
Budziem i my pamiatać, što pry žyćci dramaturha jahonaja słavutaja kamiedyja nie publikavałasia. Upieršyniu jana pabačyła śviet u Miensku za časami Biełaruskaj Narodnaj Respubliki
ŭ haziecie «Volnaja Biełaruś» (1918, №№ 30—31). Publikacyi papiaredničała zaŭvaha: «Tvor hety napisany aŭtaram pinčuckaj havorkaj y 1866 r. i da hetaha času nidzie nie drukavaŭsia. Vypraŭleny na biełaruski ład, jon drukujecca ŭ «Volnaj Biełarusi» pieršy raz. Z časam «Volnaja Biełaruś» vydrukuje i aŭtentyk hetaha tvora». Adnak tady BNR nie ździejśniłasia, a razam ź joj nie ździejśnilisia mary miljonaŭ sučaśnikaŭ pra ŭłasnuju dziaržaŭnuju niezaležnaść, pajšli ŭ niabyt šmatlikija kulturnyja zdabytki našych prodkaŭ.
«Pinskaja šlachta» — adna z cudam acalełych piarlinaŭ padniavolnaha, ale j zmaharnaha XIX stahodździa.
Ciapier čytajuć
U sacsietkach Chlastova apublikavałasia videa, zapisanaje na vypadak jaho zatrymańnia. Sam śpiavak na Akreścina6
Kamientary