Karbalevič: Rasija nikoli nie pryznaje niejtralitet Biełarusi. Kali Biełaruś pačnie vychad ź intehracyjnych struktur, Maskva ŭžyvie siłu

Dzie taja čyrvonaja linija, za jakoj Rasija moža ŭžyć siłu da Biełarusi, u Biełarusi? Na dumku Karbaleviča, u Biełarusi heta moža zdarycca, kali Minsk pačnie vychad ź intehracyjnych struktur z Rasijaj (ADKB, JEAES).

Pra heta biełaruski palitołah zajaviŭ na kanfierencyi «Iniercyja, umacavańnie niejtralitetu ci źmiena vonkavapalityčnaj aryjentacyi? Vonkavaja palityka Biełarusi na sučasnym etapie».

U svaim vystupie Valer Karbalevič nahadaŭ, što Rasija pierajšła da siłavoha scenara z Ukrainaj tolki kali Kijeŭ pastaviŭ na paradak dnia damovu pra asacyjacyju ź Jeŭrasajuzam.

Što datyčyć častaha paraŭnańnia sučasnaj Biełarusi ź Finlandyjaj, to jano nie słušnaje, adznačyŭ Karbalevič, bo Biełaruś bolš zaležnaja ad Rasii, čym Finlandyja tady. A mahčymaści drejfu Biełarusi da ES abmiežavanyja, bo pry sučasnaj ekanamičnaj madeli Biełaruś zaležyć ad tannych rasijskich enierhanośbitaŭ.

«Kab źmienšyć zaležnaść Biełarusi ad Rasii, patrebnyja rynkavyja reformy», — miarkuje Karbalevič.

Kab Biełaruś dasiahnuła realnaha niejtralitetu, palityčnaja sistema jaje pavinna stać pluralistyčnaj, adznačyŭ palitołah Siarhiej Bohdan. Akramia taho, Biełaruś pavinna harantavać Rasii, što jana nie dałučycca da NATA i nie daść vykarystoŭvać svaju terytoryju suprać Rasii. Uvohule, dasiahnuć niejtralitetu składana, zrabiŭ jon vysnovu ŭ svaim dakładzie.

«Za paŭhoda daniasieńnia mesidža dziaržaŭnymi ŚMI možna jakasna źmianić hramadskuju dumku», — adznačyŭ u svaju čarhu Andrej Jelisiejeŭ, supracoŭnik partała BelBiz. Jon pryvioŭ u padmacavańnie svajoj dumki źviestki sacyjołahaŭ pa vynikach apytańniaŭ za roznyja hady. Na dumku Jelisiejeva, staŭleńnie hramadstva da ES i Rasii zaležała ad pazicyi dziaržaŭnych ŚMI ŭ toj ci inšy pieryjad.

U toj ža čas prafiesar BDU Uładzimir Snapkoŭski adznačyŭ, što vymušany razvarot Biełarusi ad Rasii da Zachadu mahčymy tolki ŭ tym vypadku, kali Rasija prajavić ahresiju ŭ dačynieńni da Biełarusi, zamachniecca na jaje suvierenitet. Dobraachvotny razvarot Minska niemahčymy, miarkuje Snapkoŭski. Snapkoŭski ličyć trochi nadumanym, niedakazanym tezis pra toje, što Biełaruś u apošnija hady addaliłasia ad Rasii.

Analityk centra «Cytadel» Alaksandr Špakoŭski, u svaju čarhu, zaklikaŭ nie pierabolšvać prablemy ŭ biełaruska-rasijskich adnosinach. Jon pahadziŭsia, što ŭ Rasii jość čarnasocienskija koły, jakija admaŭlajuć biełarusam u pravie na ŭłasnuju dziaržaŭnaść, ale jany marhinalnyja. Taksama i ŭ Biełarusi mienš za 5% ludziej chacieli b ustupleńnia Biełarusi ŭ Rasiju, adznačyŭ Špakoŭski. «U surjoznych kołach nichto ŭsurjoz varyjantu vajennaha kanfliktu Rasii i Biełarusi nie razhladaje», — zaznačyŭ jon i nahadaŭ pra pastaŭki vajskovaj techniki Rasijaj Biełarusi.

Ź im nie pahadziŭsia Arsień Sivicki z Centra stratehičnych i zamiežnapalityčnych daśledavańniaŭ. Na dumku Sivickaha, fakt raźmiaščeńnia Rasijaj dyvizij u Klincach i Jelni na samaj miažy ź Biełaruśsiu nadzvyčaj tryvožny. A jašče bolšuju tryvohu vyklikaje toj fakt, što z kiraŭnictvam Biełarusi ŭ hetym pytańni nie railisia. Niepakoj vyklikajuć i scenary, jakija raspracoŭvajucca ŭ rasijskim Hienštabie adnosna Biełarusi, skazaŭ Sivicki.

Kanfierencyja prajšła ŭ «Drazdy-kłubie» ŭ Minsku 29 červienia. Jana była arhanizavanaja Centram Astrahorskaha ŭ ramkach cykła Ostrogorski Forum. Siarod jaje ŭdzielnikaŭ byli jak pradstaŭniki niedziaržaŭnych analityčnych centraŭ i ŚMI, tak i ekśpierty ź dziaržaŭnych struktur.

• 0
• 0
• 0
• 0
• 0
• 0
• 0
• 0