Davierlivaja minčanka skinuła arandataram z Rasii kopiju svajho pašparta. A tyja ciškom pradali jaje kvateru koštam $90 tysiač
Zrabili falšyvuju davieranaść na svajo imia, zavieryli jaje ŭ nataryusa ŭ Bałharyi — i napierad.
U sakaviku 2019 hoda da minčanki, jakaja zdavała svaju kvateru ŭ Maskoŭskim rajonie za $450 na miesiac, źviarnulisia klijenty: «ryełtar Alaksandr» i «Natalla ź Nižniaha Noŭharada».
Žančyna raskazała kranalnuju historyju — maŭlaŭ, pracuje ŭ rasijskaj firmie, što śpiecyjalizujecca na miedpreparatach, choča pieravieźci ŭ Minsk 10‑hadovaha syna, a arendu budzie apłačvać kampanija. Praŭda, dla hetaha «pracadaŭcu» nibyta patrebnaja kopija pašparta ŭłaśnicy. Taja ničoha nie zapadozryła i pieradała kopii dakumientaŭ na kvateru, svajho pašparta i klučy. «Natalla» navat paprasiła nie zaklučać aficyjny dahavor praz ŽES.
Kvateru arandatary amal nie vykarystoŭvali — haspadynia, prychodziačy pa hrošy, ździŭlałasia idealnamu paradku. A ŭ hety čas paračka rychtavała afieru: jany zrabili padroblenyja rasijskija pašparty z uklejenymi svaimi fota i falšyvuju davieranaść, nibyta vydadzienuju nataryusam u bałharskaj Varnie, pavodle jakoj ułaśnica daručaje «pradać» svaju kvateru.
10 maja 2019 hoda machlary pryjšli ŭ Minskaje haradskoje ahienctva pa dziaržrehistracyi i za 45 chvilin aformili kuplu-prodaž: žančyna vystupała ad imia ŭłaśnicy pa davieranaści, mužčyna — jak «pakupnik». Rehistratara padrobki nie naściarožyli: byŭ i apastyl, i nataryjalna zavierany pierakład. Tak kvatera koštam kala $90 tysiač aficyjna pierajšła da čałavieka, jakoha nie isnuje, — pašpart «pakupnika» taksama byŭ falšyŭkaj.
Vykryłasia ŭsio vypadkova: machlary pasprabavali kvateru pierapradać, i patencyjnaja pakupnica, jakoj «haspadar Anatol» admoviŭsia pakazvać dakumienty, źviarnułasia da vachciorki doma. Staršynia tavarystva ŭłaśnikaŭ patelefanavała sapraŭdnaj haspadyni. A kančatkova žančyna daviedałasia, što jaje kvatera «pradadzienaja», u padatkovaj, kudy pryjšła aformić vypłatu padatku ad arendy.
Biełaruski sud pryznaŭ ździełku nikčemnaj i viarnuŭ joj prava ŭłasnaści.
Śledstva vyśvietliła, što za «Natallaj» i «Alaksandram» chavalisia rasijanie Maryna Marava i Kanstancin Bašaryn. Pryčym dla Maravaj heta była adpracavanaja schiema: u tym ža 2019 hodzie jana hetak ža «ŭviała» kvateru ŭ rasijskaj Kastramie — źniała jaje pa padroblenym biełaruskim pašparcie, pierarehistravała na siabie i paśpieła pradać maładoj siamji. Pakupniki daviedalisia, što kupili čužuju kvateru, kali sustreli ŭ joj sapraŭdnych haspadaroŭ.
Biełaruskaja prakuratura pieradała spravu rasijskim kaleham. 13 śniežnia 2024 hoda Leninski rajonny sud Kastramy pryznaŭ abaich vinavatymi ŭ machlarstvie ŭ asabliva bujnym pamiery. Marava atrymała z ulikam raniejšaha prysudu 5 hadoŭ 4 miesiacy kałonii, Bašaryn — paŭtara hoda. Praŭda, z zaličeńniem užo adsiedžanaha terminu abaich vyzvalili prosta ŭ zale suda — pakarańnie paličyli całkam adbytym. Vinu jany tak i nie pryznali.
Kamientary