Rasija i Paŭnočnaja Kareja amal dabudavali pieršy aŭtamabilny most pamiž krainami
Dziakujučy novamu mostu pamiž Rasijaj i Paŭnočnaj Karejaj upieršyniu stanie mahčymym pramy aŭtamabilny ruch. Aficyjna jon pryznačany dla raźvićcia handlu i turyzmu, adnak daśledčyki ličać, što nasamreč novaja pieraprava moža spraścić vajennuju łahistyku i zrabić pieravozku hruzaŭ mienš prykmietnaj dla spadarožnikavaha nazirańnia.
Most praz raku Tumannuju (Tumanhan) złučyć rasijski pasiołak Chasan na Dalokim Uschodzie i paŭnočnakarejski Tumanhan. Jon prachodzić pobač z užo isnujučym čyhunačnym «Mostam družby», jaki da hetaha času byŭ adzinaj suchaputnaj pierapravaj pamiž dźviuma dziaržavami.
Most maje daŭžyniu kala 1 km i šyryniu siem mietraŭ ź dźviuma pałosami ruchu. Razam z padjaznymi darohami ŭvieś kompleks maje praciahłaść 4,7 km. Spadarožnikavyja zdymki taksama pakazvajuć budaŭnictva dapamožnaj infrastruktury na rasijskim baku, u tym liku viertalotnaj placoŭki.
Jak piša The Guardian, Paŭnočnaja Kareja ŭžo zaviaršyła svaju častku budaŭnictva, uklučajučy mytnyja i karancinnyja punkty. Adkryćcio płanavałasia na 19 červienia, ale rasijski bok nie paśpieŭ skončyć raboty ŭ vyznačany termin. Novuju datu adkryćcia pakul nie abviaścili.
Maskva i Pchieńjan nie robiać sakretu z hetaha prajekta, zajaŭlajučy, što jon nakiravany na pašyreńnie handlu i turyzmu. Ministr transpartu Rasii Andrej Nikicin kazaŭ, što novaja pieraprava pavinna pavialičyć tavaraabarot i spryjać raźvićciu pamiežnych terytoryj. Dziaržaŭnaje ahienctva KNDR KCNA taksama paviedamlała, što most budzie sadziejničać pieramiaščeńniu ludziej, turyzmu i abmienu tavarami.
Adnak novaje rasśledavańnie ŭkrainskaj pravaabarončaj hrupy Truth Hounds śviedčyć pra toje, što most pryznačany chutčej dla stvareńnia schavanaha vajenna-łahistyčnaha kalidora, čym dla stymulavańnia ekanomiki.
Pavodle rasśledavańnia, ekanamičnaja metazhodnaść prajekta vyhladaje sumnieŭnaj. Pavodle acenak daśledčykaŭ, budaŭnictva kaštavała bolš za 100 miljonaŭ dołaraŭ, tady jak abjom handlu pamiž Rasijaj i KNDR u 2024 hodzie składaŭ tolki kala 34 miljonaŭ dołaraŭ.
Akramia taho, turyzm z Rasii ŭ Paŭnočnuju Kareju pa-raniejšamu žorstka kantralujecca. Zamiežnikaŭ puskajuć pieravažna ŭ składzie arhanizavanych hrup u supravadžeńni hidaŭ. U 2025 hodzie krainu naviedali kala 10 tysiač rasijan, pryčym bolšaść ź ich nakiroŭvałasia ŭ Pchieńjan, jaki znachodzicca bolš čym za 500 kiłamietraŭ ad novaha mosta.
Aŭtary rasśledavańnia miarkujuć, što most pierš za ŭsio maje stratehičnaje značeńnie. Na ich dumku, aŭtamabilnyja pieravozki značna ciažej adsočvać sa spadarožnikaŭ, čym čyhunačnyja.
Typ vahona, jaki bačny na zdymku, moža šmat raskazać pra hruz. Peŭnyja katehoryi tavaraŭ pieravoziacca ŭ adkrytych vahonach, što dazvalaje ich identyfikavać. Hruzaviki ž na spadarožnikavych zdymkach amal zaŭsiody vyhladajuć adnolkava, a pahruzku možna pravodzić u roznych miescach, tady jak ciahniki pryviazanyja da niekalkich čyhunačnych vuzłoŭ.
Akramia taho, zahruzka i razhruzka hruzavikoŭ moža adbyvacca značna chutčej, čym u vypadku z vahonami, jakija daŭžej znachodziacca pad spadarožnikavym nazirańniem.
Jašče adna pieravaha novaha maršrutu ŭ tym, što aŭtamabilny transpart nie zaležyć ad roznaj šyryni čyhunačnaj kalainy ŭ Rasii i KNDR. Na čyhuncy vahony patrabujuć zamieny kołavych par pry pierasiačeńni miažy, a dla hruzavikoŭ takoj prablemy niama.
Pavodle Truth Hounds, novaja daroha moža vykarystoŭvacca dla pieravozki paŭnočnakarejskich vajskoŭcaŭ, budaŭničych bryhad i słužbovych asob u Rasiju, a taksama dla pastavak u KNDR rasijskich technałohij i inšych resursaŭ.
Aktyŭnaje budaŭnictva mosta pačałosia paśla padpisańnia ŭ červieni 2024 hoda pahadnieńnia ab usieabdymnym stratehičnym partniorstvie pamiž Rasijaj i KNDR. Z taho času, pavodle adkrytych danych, Paŭnočnaja Kareja pačała pastaŭlać vojski, artyleryjskija bojeprypasy i balistyčnyja rakiety dla padtrymki vajny Rasii va Ukrainie.
Ciapier čytajuć
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca7
Kamientary