Paśla artykuła «Imion» pra stan dziaciej u internatach prakuratura pačała pravierku, a ludzi sabrali $35 tysiač
Kažuć, šakujučyja foty hetych dystrafičnych dziaciej pakłali na stoł Alaksandra Łukašenki.
Ich kormiać, jak zvyčajna. Ale charaktar ich nieŭrałahičnych zachvorvańniaŭ taki, što zvyčajnaje charčavańnie, dastatkovaje zvyčajnamu čałavieku, nie zasvojvajecca.
Usie machnuli rukoj na horkuju dolu hetych małych jak na niepaźbiežnaść. Ale znajšoŭsia doktar, piedyjatr Alaksiej Momataŭ.
Momataŭ dakazvaje: kali pieravieści hetych dziaciej na enteralnaje, daražejšaje charčavańnie, ich pakuty źmienšacca, jany pražyvuć daŭžej. Jamu toje padkazaŭ «adzin aŭstryjski lekar, jaki, pahladzieŭšy na dziaciej, najbolš dakładna i vyrazna rastłumačyŭ, što ź imi adbyvajecca. «Była tady ŭ nas Lenka, chudaja, biłasia hałavoj ab stoł i ab ścieny. U jaje navat byli siniaki. Dyk voś kali my pačali davać joj heta charčavańnie, jana supakoiłasia. Vychodzić, jana hałodnaja była … A tut joj prosta stali davać toje, što było patrebna. Na toj momant joj było siem ci vosiem hadoŭ. Pamierła Lenka ŭ minułym hodzie. U jaje byli prablemy z straŭnikava-kišačnym traktam», — raskazvaje Momataŭ.
Materyjał «Imionaŭ» z apaviadańniem čułaha sercam doktara Momatava vyklikaŭ niečuvany rozhałas.
«Imiony» razam z kraŭdfandynhavaj płatformaj «Tałaka» pačali źbirać hrošy na arhanizacyju enteralnaha charčavańnia dla žycharoŭ internata dla dziaciej z asablivaściami psichafizičnaha raźvićcia.
Ludzi naźbirali hrošaj bolš jak na hod.
Jość i inšaja reakcyja.
Pravierki ź siłavych struktur pryjšli i da daktaroŭ, i ŭ dzieviać internataŭ Biełarusi, dzie žyvuć dzieci z asablivaściami psicha-fizičnaha raźvićcia.
U nieaficyjnaj hutarcy prakurory vykazali padziaku «Imionam» i ludziam za dapamohu i ŭdzieł u vyrašeńni surjoznaj sacyjalnaj prablemy.
— Ja takoha ŭ Biełarusi jašče nie bačyŭ! — skazaŭ adzin z prakuroraŭ. — Dziakuj.
Prakurory vyśviatlajuć, čym kormiać dziaciej i jak raźmiarkoŭvajucca srodki dziaržbiudžetu.
Što budzie z sabranymi hrašyma? Usie hrošy ciapier znachodziacca na pazabiudžetnym rachunku internata. Doktar Alaksiej Momat raspavioŭ «Imionam», što, dziakujučy sabranym srodkam, pačali zakuplać enteralnaje charčavańnie. Pieršaja partyja ŭžo zakuplena, pryjechała ŭ internat i pa pryznačeńni miedykaŭ idzie dzieciam. Častka charčavańnia — asobna ad sumy, sabranaj ludźmi, — zakuplena za biudžet horada.
Kolkim dzieciam treba heta charčavańnie? Adrazu paśla vychadu artykuła Kamitet sacyjalnaj abarony, jaki kuryruje hety internat, ahučyŭ, što dziaciej, jakija majuć patrebu ŭ enteralnym charčavańni, — 15, a nie 50, jak zajaviŭ u intervju «Imionam» doktar Alaksiej Momat. Miedyki internata tak i nie zmahli zrazumieć, čamu sacabarona ahučvaje takuju ličbu. Na minułym i na hetym tydni dziaciej abśledavali śpiecyjalisty z kamiteta pa achovie zdaroŭja Minharvykankama i Ministerstva achovy zdaroŭja, i vysnovy miedykaŭ byli inšymi.
— Vyznačyli, što takoje charčavańnie ciapier treba 49 dzieciam, - kamuści — całkam, kamuści — kursami, — raspaviała «Imionam» druhaja doktarka internata Maryna Fiedarenčyk.
Maryna Leanidaŭna ciapier vykonvaje abaviazki dyrektara internata, bo na dniach papiaredniaha dyrektara Valeryja Siŭcova zvolnili. Pryčyny zvalnieńnia pakul nie ahučvajucca.
Ciapier čytajuć
«Ruki preč ad sasisačak!». U sacsietkach horača abmiarkoŭvajuć baraćbu Łukašenki z kavaj na zapraŭkach. Niekatoryja zaklikajuć dziejničać bolš žorstka1919
Kamientary