Aleś Kirkievič: «Adzin źbiŭ z noh, a druhi ŭdaryŭ kałom pa hałavie». Niaŭžo milicyja nie znojdzie napadnikaŭ?
«Adzin źbiŭ z noh, a druhi ŭdaryŭ kałom pa hałavie», — raskazvaje žurnalist Aleś Kirkievič, jaki paciarpieŭ siońnia ŭnačy pry napadzie nieviadomych na namiot pratestoŭcaŭ suprać pabudovy ofisnaha centra ŭ Zialonym Łuzie kala Kurapat.
Pačatak budoŭli vyklikaŭ abureńnie miascovych žycharoŭ, a taksama ludziej, čyje prodki byli rasstralanyja ŭ Kurapatach u 1929—1941 hadach.
Jak vyśviatliłasia, zabudova łapika miž MKAD i vulicaj Mirašničenki stała mahčymaja, bo ŭ 2014 hodzie Ministerstva kultury dazvolili źmianić hranicu achoŭnaj zony niekropala ŭ Kurapatach. Miž tym učastak u arendu byŭ vydzieleny ŭ 2013 hoda, što było parušeńniem i daje farmalnuju nahodu dla admieny rašeńnia.
Siońnia ŭnačy kala 3-j hadziny 15—20 maładzionaŭ napali na dziasiatak junakoŭ, što vartavali kala budplacoŭki. Častka «vartaŭnikoŭ Kurapat» uciakli ŭ les, inšaja akazała supraciŭ.
Napadniki raskidali namiot, sarvali biełaruskija ściahi i pierakulili bočku z vohniščam. Pry hetym jany hukali «Biełaja rasa!».
Chto jany byli?
«Mnie padałosia, što jany chacieli stvaryć uražańnie, što heta fanaty, — kaža Kirkievič. — Vyhukaŭ «Słava Rasii» asabista ja nie čuŭ, tolki «Biełaja rasa!»
Kirkievič apisvaje napadnikaŭ jak maładych ludziej va ŭzroście da 25 hadoŭ. Na jahonuju dumku, heta nie mahli być pieraapranutyja śpiecnazaŭcy, jakija b dziejničali bolš prafiesijna.
«Mahčyma, heta byli kursanty ci spartoŭcy», — vykazvaje mierkavańnie jon.
Jahonuju ŭvahu źviarnuŭ toj fakt, što za paru hadzin da źjaŭleńnia citušak z budplacoŭki źnikli milicyjanty-cichary i źjechaŭ «koźlik» z amapaŭcami.
Paśla chvilinnaha napadu chulihany syšli praz tunel u bok Kurapat.
Žurnalistaŭ, akramia, Kirkieviča na vachcie ŭ momant napadu nie było.
Kurapaty — miesca, dzie saviety rasstralali dziasiatki tysiač hramadzian Biełarusi. Heta była častka palityki, skiravanaj na vyniščeńnie nacyjanalnych elit, zdolnych uznačalić supraciŭ paniavolenych narodaŭ. U Biełarusi byli zahublenyja praktyčna ŭsie bahatyja sialanie, bolšaść piśmieńnikaŭ, ministraŭ, akademikaŭ, a paźniej, u niekalki pryjomaŭ, sami čekisty, jakija ŭdzielničali ŭ aryštach i rasstrełach.
Kirkievič nie rašajecca rabić zdahadak, chto moh arhanizavać napad. Ale vielmi sumnieŭna, kab niechta moh u miežach MKAD hetkaje praviarnuć niezaŭvažna dla orhanaŭ unutranych spraŭ.
Milicyja abmiažoŭvajecca zajavaj, što pravodzić pravierku pa fakcie incydenta.
«Siońnia ŭ 5.35 na śpiecliniju 102 pastupiła paviedamleńnie ab tym, što kala 4-j hadzin ranicy na hramadzian u Savieckim rajonie stalicy napali dva dziasiatki nieviadomych asobaŭ. Da miesca zdareńnia nieadkładna byŭ nakiravany narad supracoŭnikaŭ milicyi Savieckaha RUUS Minska, byli praviedzieny papiarednija pravieračnyja mierapryjemstvy. Pa stanie na 9 hadzin ranicy hramadzianie, jakija źviarnulisia ŭ milicyju, ad napisańnia zajaŭ i ad jakich-niebudź tłumačeńniaŭ admovilisia. Razam z tym pa fakcie, jaki pastupiŭ ad ich zvarotu ŭ milicyju pravodzicca pravierka», — skazaŭ «Našaj Nivie» pres-sakratar HUUS Minharvykankama Alaksandr Łastoŭski.
Kamientary