Piać faktaŭ pra słynnaha milicyjaniera Ihara Jaŭsiejeva, jaki staŭ pamočnikam Łukašenki pa Minskaj vobłaści
28 vieraśnia Alaksandr Łukašenka pryznačyŭ hienierał-majora milicyi Ihara Jaŭsiejeva svaim pamočnikam pa Minskaj vobłaści. Da hetaha jon dva hady ŭznačalvaŭ UUS Minščyny.
Fota Siarhiej Hapon, kp.by.
«Naša Niva» zhadvaje piać cikavych faktaŭ ź bijahrafii 49-hadovaha Ihara Jaŭsiejeva.
Nie pieršy hienierał z Rosi
Fota tut.by
Naradziŭsia Ihar Jaŭsiejeŭ u miastečku Roś Vaŭkavyskaha rajona. Heta nie pieršy hienierał z hetych miaścin. U Rosi taksama naradziŭsia bryhadny hienierał Vojska Polskaha Ramuald Vałyncevič. U miastečku jość vytvorčaść budaŭničych materyjałaŭ. Baćka Jaŭsiejeva, darečy, i byŭ budaŭnikom, a maci — nastaŭnicaj. Chacia sam milicyjant pryznavaŭsia, što hadavali jaho babula ź dziadulem. «Byŭ raśpieščanym i słaba padrychtavanym da žyćcia», — tak aceńvaŭ Jaŭsiejeŭ pieryjad dziacinstva.
Paśla vaśmi kłasaŭ pajšoŭ vučycca ŭ Pružanski sielhastechnikum. Kazaŭ, što ŭ toj čas byŭ vielmi hramadska aktyŭnym. U pryvatnaści, zajmaŭsia muziejem Vialikaj ajčynnaj vajny. Pisaŭ listy i asabista sustrakaŭsia z mnohimi ŭdzielnikami toj vajny.
Śpiecnaz HRU i achova Łukašenki
Fota Siarhieja Hudzilina
U vojska Jaŭsiejeŭ trapiŭ u treciuju bryhadu śpiecnaza HRU VPS (Hałoŭnaha raźviedvalnaha ŭpraŭleńnia Vajskova-pavietranych siłaŭ), jakaja dysłakavałasia ŭ toj čas u HDR. Elitnyja vojski. Razvał SSSR sustreŭ učastkovym u Pružanskim RUUSie. Pracavaŭ u achovie Łukašenki jašče ŭ pieršyja hady prezidenctva. Zajmaŭ pasadu namieśnika načalnika UUS Minskaha rajvykankama. Paśla staŭ načalnikam Upraŭleńnia achovy pravaparadku i prafiłaktyki UUS na transparcie.
Uśmiryciel Płoščaŭ
Ale imia Jaŭsiejeva na słychu stała paśla taho, jak jon zaniaŭ pasadu načalnika milicyi hramadskaj biaśpieki Minharvykankama. U niepasrednyja abaviazki Jaŭsiejeva ŭvachodziła sačeńnie za masavymi akcyjami i ich ucichamiravańnie (najčaściej šlacham razhonu). Nie curaŭsia i sam prymać udzieł u źbićci. Naprykład, usim dobra pamiatajecca, jak ad Jaŭsiejeva u pieršyja dni paśla Płoščy paciarpieŭ fatohraf Uładź Hrydzin. Jaŭsiejeŭ byŭ adnym z hałoŭnych dziejučych piersanažaŭ padčas samoj Płoščy-2010. Jon chadziŭ na pieramovy z kandydatami ŭ prezidenty. Čym skončyłasia Płošča, niama nahody lišni raz nahadvać. Paśla jaje Jaŭsiejeŭ trapiŭ u śpisy nieŭjaznych na terytoryju Jeŭrasajuza pad numaram 84. A voś Łukašenka za Płošču dasłaŭ Jaŭsiejevu padziačny list.
«Chłopać možna tolki vieteranam»
Fota Siarhieja Hudzilina
Paśla Jaŭsiejeŭ byŭ vidnym dziejačam padčas «Stop — bienzinu» i maŭklivych akcyj pratestu. Kaardynavaŭ i kamandavaŭ razhonami mienavita jon. Vykarystoŭvajučy i niecenzurnuju leksiku (hladzicie videa; na Akreścina jaho nichto za heta nie pasadziŭ). Pierad maŭklivaj akcyjaj na Dzień Respubliki Jaŭsiejeŭ adznačyŭ, što apładziravać možna tolki vieteranam. Razhon kala Čyhunačnaha vakzała na 3 lipienia byŭ adnym z najbolš brutalnych paśla Płoščy.
«Milicyjanier — heta ład žyćcia»
Fota president.gov.by
U pryvatnym žyćci Jaŭsiejeŭ žanaty, maje traich dziaciej. Kažuć, što fotazdymak siamji staić u jaho na pracoŭnym miescy. Ličyć, što «milicyjanier — heta ład žyćcia».
U červieni 2013 Jaŭsiejeva pryznačyli kiraŭnikom Viciebskaha UUS. Amal za dva hady pracy ŭ Viciebsku ničym asablivym Jaŭsiejeŭ nie adznačyŭsia, spraŭna vykonvaŭ pracu pa biaśpiecy ŭ čas «Słavianskaha bazara».
Pryhody z žurnalistami ŭ Jaŭsiejeva praciahvalisia i ŭ Viciebsku. Miascovyja raskazvajuć, jak padčas Dnia desantnika ŭ 2013-m Jaŭsiejeŭ «załamaŭ» fotakarespandenta adnoj dziaržaŭnaj haziety, jaki zdymaŭ zatrymańni milicyjaj pjanych desantnikaŭ. Praŭda, potym hetaha ž žurnalista ŭznaharodžavali ŭ Viciebskim UUS za dobruju pracu. Na hetym kanflikt byŭ vyčarpany.
Jaŭsiejeŭ kazaŭ, što Viciebsk jamu padabajecca, bo ŭ horadzie niama minskaj mituśni. Časta źjaŭlaŭsia ŭ horadzie razam z žonkaj i małoj dačkoj. Hod tamu Łukašenka ŭručyŭ Jaŭsiejevu orden «Za słužbu Radzimie» III stupieni.
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks15
Kamientary