Mutnaja historyja: biełaruska, jakaja zajmajecca mahijaj, śćviardžaje, što ŭ aeraporcie Vilni joj hvałtoŭna zrabili endaskapiju
Biełaruska (u sacsietkach jana paznačaje svaim miescam žycharstva Maskvu) Nika Košar viartałasia z adpačynku ŭ Pieru. Ź Limy jana prylacieła ŭ Amsterdam, dzie 15 sakavika sieła na rejs da Vilni — adtul jana źbirałasia na ciahniku dabracca da Minska. Ale litoŭskija mytniki zapadozryli dziaŭčynu ŭ kantrabandzie narkotykaŭ i arhanizavali joj tatalny nadhlad — pačynajučy ź pieratrusu i zakančvajučy endaskopam i MRT. Žančyna raskazała pra heta na svajoj staroncy ŭ Facebook.
La trapa samalota jaje čakali dva čałavieki ŭ cyvilnym i piać supracoŭnikaŭ litoŭskaj mytni.
«Uziali moj pašpart, pierahlanulisia i skazali, maŭlaŭ, heta jana. Adviali ŭ bok, skazali što treba sioje-toje vyśvietlić. Spytali pra niejkaha Raula abo Paŭla, ci lacić jon sa mnoj. Ja nikoha takoha nie viedaju, tak im i adkazała», — raspaviadaje Košar.
Paśla hetaha jaje z rečami adpravili na nadhlad. U kabiniecie było vosiem čałaviek i słužbovy sabaka. Z valizki dastali ŭsie rečy — praviarali na narkotyki.
«Dalej usie mužčyny vyjšli, zastalisia žančyny. Mnie zahadali raspranucca całkam. Ahledzieli. Abmacali. Narkotykaŭ nidzie nie znajšli. Ale paśla hetaha nie adpuścili. Skazali, što pajedziem na ahlad u kliniku, tamu što ja, chutčej za ŭsio, pravožu narkotyki ŭnutry», — praciahvaje apovied Nika Košar.
U klinicy dziaŭčynie zrabili renthien. Lekary ničoha nie tłumačyli joj, majučy znosiny pamiž saboj pa-litoŭsku. Paśla renthienu jaje pratrymali jašče dźvie hadziny, zabaraniajučy pry hetym pić i naviedvać tualet. Zatym nastała čarha endaskapii.
«Viedajecie, heta było padobna na akt kanibalizmu. Bo doktar hety vielizarny. Ruki mnie trymała siastra. I voś jon uvodziŭ u mianie hetuju trubku. Jana dzieści santymietr taŭščynioj. Jon rabiŭ usio vielmi hruba i žorstka. Mianie vanitavała, było ciažka dychać. Serca stukała, ruku źviało sutarhaj», — raspaviała Košar.
Paśla endaskapii dziaŭčynie paviedamili, što jaje čakaje ahlad pramoj kiški i pochvy. Zamiest ahladu Niku adviali na MRT.
Paśla ŭsich pracedur palicejskija paprasili prabačeńnia ŭ dziaŭčyny za dastaŭlenyja niazručnaści i zaprasili pryjazdžać jašče.
Kamientaroŭ litoŭskaha boku pakul nie było.
Nadhlad takoj stupieni ažyćciaŭlajecca tady, kali śpiecsłužby majuć stapracentavuju infarmacyju, što dadzieny čałaviek — narkakurjer. Pakul niajasna, chto ŭ dadzienym vypadku padstaviŭ litoŭski narkakantrol.
Na staroncy Niki Košar u fejsbuku pra svaje zaniatki jana havoryć: «Vołšiebničaju i smotriu na niebo at Prostaja mahija». U svaju čarhu, nie nadta napoŭnienaja staronka «Prostaj mahii» havoryć pra astrałohiju i zaprašaje na mahičnyja kansultacyi. Na inšym sajcie jana źmiaściła infarmacyju, što z 31 studzienia pravodzić anłajn-kviest «Posłanije Chu-Iń ili Bohičieskaja kruhośvietka».
Kamientary