Pačaŭsia sud nad redaktarkaj Tut.baj. Publika sustreła jaje dvuchchvilinnaj avacyjaj
12 lutaha pačaŭsia sud nad Marynaj Zołatavaj, hałoŭnaj redaktarkaj partała Tut.by. Pry apytańni śviedkaŭ, supracoŭnikaŭ BiełTA, vyśvietliłasia, što ŭ damovach BiełTA z klijentami da 2019 hoda nie była prapisanaja zabarona pieradavać paroli dostupu da płatnaha kantentu trecim asobam.
9:51
Pryjšli staršynia Biełaruskaj asacyjacyi žurnalistaŭ (nie błytać ź Biełaruskim sajuzam žurnalistaŭ) Andrej Bastuniec i ŭsio kiraŭnictva hetaj arhanizacyi, byłaja staršynia BAŽ Žanna Litvina. U zale taksama — šmatlikija błohiery, siarod ich baču Eduarda Palčysa, Antona Matolku, Aramaisa Mirakiana. Prysutny były palitviazień Ščukin.
9:50
Na ŭvachodzie prysutnych praviarajuć na ramcy mietałašukalnika.
9:48
Hracyjoznaju chadoju ŭ zału zajšła karespandentka dziaržaŭnaha telekanała ANT. Adhadajma, jaki budzie repartaž i ci daduć u im słova druhomu boku — Marynie Zołatavaj i jaje advakatu.
9.40
Dla suda addali najbolšuju zału ŭ sudzie Maskoŭskaha rajona. Jana źmiaščaje 170 čałaviek. Zadoŭha da pačatku kala jaje sabralisia dziasiatki ludziej. Siarod prysutnych — redaktary «Narodnaj voli» Iosif Siaredzič i BiełaPAN Iryna Leŭšyna, dypłamaty krain Jeŭrapiejskaha sajuza i ZŠA, deputatka Hanna Kanapackaja. Pryjšli šmatlikija kalehi Maryny Zołatavaj z Tut.baja ŭ majkach «Banalny chakier».
* * *
12 lutaha pačynajecca sud nad Marynaj Zołatavaj, hałoŭnaj redaktarkaj partała Tut.by.
Zołatava — apošni fihurant tak zvanaj «spravy Biełta». U žniŭni 2018 hoda 14 žurnalistaŭ roznych vydańniaŭ (Tut.by, BiełaPAN, «Biełarusy i rynak») abvinavacili ŭ niesankcyjanavanym dostupie da kampjutarnaj infarmacyi, jakaja naležała dziaržinfarmahienctvu Biełta. Kali kazać praściej, to žurnalistam pastavili ŭ vinu, što jany niezakonna karystalisia parolami, jakija davali dostup da płatnaha kantentu na sajcie Biełta.
A pačałosia ŭsio — pa viersii hałoŭnaj redaktarki Biełty Iryny Akułovič — z taho, što ŭ dziaržinfarmahienctva nibyta pastupili skarhi na prablemy z aŭtaryzacyjaj ad płatnych padpisčykaŭ. Tady kiraŭnictva Biełty źviarnułasia ŭ milicyju, kab tam razabralisia.
U ofisach Tut.by i BiełaPAN prajšli vobšuki. U toj ža dzień Biełaruskaje telebačańnie apublikavała prasłuchoŭvańnie telefonnych razmoŭ redaktarak Tut.by Maryny Zołatavaj i Hanny Kałtyhinaj, što padavałasia jak vidavočny dokaz ich viny.
Vobšuki prajšli i ŭ kvaterach žurnalistaŭ. Zatym pačalisia zatrymańni. Na niekalki sutak u SIZA źmiaścili supracoŭnikaŭ Tut.by Marynu Zołatavu, Hannu Kałtyhinu, Halinu Ułasik, Hannu Jermačonak, hałoŭnuju redaktarku BiełaPAN Irynu Leŭšynu, redaktara sajta «Biełarusy i rynak» Alaksieja Žukava, ahladalnika «Niamieckaj zvali» Paŭluka Bykoŭskaha.
Byli zaviedzienyja kryminalnyja spravy. Ale ź ciaham času ad kryminalnaj adkaznaści vyzvalili ŭsich, akramia hałoŭnaj redaktarki Tut.by (praŭda, astatnich žurnalistaŭ i redaktaraŭ pakarali administratyŭnymi štrafami, abaviazali vypłacić roznyja sumy, kab kampiensavać škodu). A Marynie Zołatavaj vystavili abvinavačvańnie ŭ biaździejnaści słužbovaj asoby. Pakarańnie — ad štrafu da 5 hadoŭ pazbaŭleńnia voli.
Los Zołatavaj budzie vyrašać sudździa Alaksandr Pietraš.
«Budziem prykładać usie siły, kab dakazać, što heta dziŭnaja sprava. Nakolki heta paŭpłyvaje na vyrak — ciažka skazać, pahladzim. Ale ja ž aptymist», — dała karotki kamientar pierad sudom Maryna Zołatava.
«Nadzieja Ściapanaŭna». Mikita Najdzionaŭ apublikavaŭ paemu, jakaja naradziłasia ŭ Žodzinskaj turmie. Takoha paetyčnaha epasu ŭ biełaruskaj paezii XXI stahodździa jašče nie było66
Kamientary