«Intares prajaŭlajem». Instytut historyi prakamientavaŭ situacyju vakoł pareštkaŭ paŭstancaŭ Kalinoŭskaha
Namieśnik dyrektara pa navukovaj pracy Instytuta historyi NAN Biełarusi Vadzim Łakiza zajaviŭ, što Biełaruś prajaŭlaje intares da pareštkaŭ paŭstancaŭ Kalinoŭskaha, znojdzienych u Vilni, piša Radyjo Svaboda.
U Litvie stvoranaja dziaržaŭnaja kamisija ŭ spravie pierapachavańnia pareštkaŭ paŭstancaŭ Kalinoŭskaha pad kiraŭnictvam premjer-ministra Saŭlusa Skviarnialisa. U jaje pracy biare ŭdzieł doktar humanitarnych navuk, były dyrektar Instytuta historyi Litvy Alvidas Nikžantajcis.
Pavodle jaho, kali litoŭski i polski bok damaŭlajucca ab niuansach miemaryjalizacyi, to aficyjnaja Biełaruś heta paprostu ihnaruje. Alvidas Nikžantajcis skazaŭ Svabodzie, što za ŭvieś čas pracy kamisii ź biełaruskaha aficyjnaha boku «nie vyjaŭlena ni kropli intaresu».
«Pryjechali adnojčy śpiecyjalisty ź Biełarusi, ale heta była niefarmalnaja sustreča», — skazaŭ Alvidas Nikžantajcis.
Vadzim Łakiza skazaŭ, što «heta niapraŭda».
«Intares prajaŭlajecca. Pracuje i MZS, i inšyja ŭstanovy. Naša hrupa jeździła ź Biełarusi ŭ Litvu: archieołah, antrapołah, śpiecyjalisty, ekśpierty-kryminalisty. Była aficyjna nakiravanaja ź dziaržaŭnych arhanizacyj, ustanoŭ Biełarusi hrupa, jakaja sustrakałasia ŭ Litvie ŭ MZS, i našy dypłamaty byli kuratarami hetaj sustrečy. Dyk jak možna kazać, što jana nieaficyjnaja ci niefarmalnaja?»
Pavodle Vadzima Łakizy, «praca dalej praciahvajecca».
«Hrupa zrabiła peŭnyja vysnovy, svaje dumki vykazała, nakiravała ŭ arhanizacyi, jakija pasyłali. Pytańnie vyrašajecca».
Vadzim Łakiza nie adkazaŭ na pytańnie, ci budzie niechta ź biełaruskaha boku brać udzieł u pierazachavańni pareštkaŭ paŭstancaŭ Kalinoŭskaha.
«Maja asabistaja dumka: pradstaŭniki biełaruskaha boku pavinny brać udzieł. I ja dumaju, što voźmuć udzieł».
Litoŭskija śpiecyjalisty kažuć, što treba ŭziać DNK brata Kastusia Kalinoŭskaha Viktara, pachavanaha ŭ Śvisłačy dziela identyfikacyi pareštkaŭ. Ci dapamoža biełaruski bok?
«Hetaje pytańnie prapracoŭvajecca. Navat učora pra heta była razmova. Mahiła Viktara Kalinoŭskaha dakładna abaznačana. Proby mahčyma ŭziać».
Kamientary