Fiestyval «Rok za žyćcio» sioleta projdzie ŭ Mahilovie i Minsku

Fiestyval «Rok za žyćcio», prymierkavany da Suśvietnaha dnia baraćby suprać śmiarotnaha pakarańnia, adbudziecca ŭ čaćviorty raz.

5 kastryčnika ŭ minskim kłubie Re:Public syhrajuć Nizkiz, «Krama», «Raźbitaje serca pacana», Re1ikt i Luty Sakavik. Upieršyniu kancert u miežach fiestyvalu projdzie i ŭ Mahilovie. 6 kastryčnika na scenu kłuba Cuba vyjduć «Pietla pristrastija», «Raźbitaje serca pacana», Re1ikt i Luty Sakavik.

Suśvietny dzień baraćby suprać śmiarotnaha pakarańnia adznačajecca 10 kastryčnika. Jon zasnavany Suśvietnaj kaalicyjaj suprać śmiarotnaha pakarańnia — abjadnańniem prafsajuzaŭ, miascovych i rehijanalnych orhanaŭ ułady, jurydyčnych asacyjacyj, a taksama pravaabarončych arhanizacyj z metaj paŭsiudnaj zabarony na hety vid vyšejšaj miery pakarańnia. Prychilniki ruchu vystupajuć suprać śmiarotnaha pakarańnia va ŭsich vypadkach biez vyklučeńnia, niezaležna ad charaktaru złačynstva, charaktarystyk złačyncy i sposabu, jakim dziaržava pazbaŭlaje žyćcia asudžanaha. Śmiarotnaje pakarańnie parušaje prava na žyćcio, abvieščanaje ŭ Suśvietnaj dekłaracyi pravoŭ čałavieka.

Biełaruś dahetul zastajecca adzinaj jeŭrapiejskaj krainaj, jakaja prymianiaje śmiarotnaje pakarańnie. Pavodle źviestak pravaabaroncaŭ, za apošnija dvaccać hadoŭ u krainie pakarana bolš za 400 čałaviek.

Viadomyja muzyki va ŭsim śviecie aktyŭna vystupajuć suprać hetaj antyhumannaj miery. Adpaviedny zvarot da biełarusaŭ u 2010 hodzie zapisaŭ Stynh, u 2014-m u prajekcie «Apošni zołak» paŭdzielničali Hanna Chitryk, Aleś Dzianisaŭ, Lavon Volski, Viktar Rudenka, Źmicier Vajciuškievič, Alaksandr Pamidoraŭ i Anastasija Špakoŭskaja. Fiestyval «Rok za žyćcio» raniej pravodziŭsia ŭ Breście, Viciebsku i Minsku.

«Choć pakarańnie i pavinna być niezvarotnym, suvymiernym ździejśnienamu złačynstvu i spraviadlivym, śmiarotnaje pakarańnie nie lepšy sposab, — miarkuje Źmicier Chalaŭkin z hurta Nizkiz. — Zaŭsiody jość ryzyka pamyłki, isnuje mnostva prykładaŭ. Taksama patrebnyja ludzi, jakija buduć vykonvać prysudy, a značyć, jany taksama buduć zabojcami. Śmiarotnaje pakarańnie — heta zabojstva, tolki ŭzakonienaje. A žorstkaść zaŭsiody budzie sparadžać žorstkaść».

«Ja suprać śmiarotnaha pakarańnia, tamu što potym užo ničoha nie vypravić», — łakanična vykazvajecca frontmien «Piatli» Illa Čarapko-Samachvałaŭ.

Fiestyval «Rok za žyćcio», Minsk

NIZKIZ, KRAMA, RE1iKT RSP, LUTY SAKAVIK

5 kastryčnika, Minsk, kłub Re:Public, vuł. Prytyckaha, 62 (st.m. Kuncaŭščyna)

Dźviery: 17.00
Pačatak: 18.00
Kvitki: ad 7 rubloŭ
Daviedka: +375291212296

Mahiloŭ

PIETLA PRISTRASTIJA, RSP, RE1iKT, LUTY SAKAVIK

6 kastryčnika, Mahiloŭ, kłub Cuba (vuł. Pieršamajskaja, 29)
Pačatak: 17.00
Kvitki: ad 7 rub.
Daviedka: +375291212296

• 0
• 0
• 0
• 0
• 0
• 0
• 0
• 0