Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni
33‑hadovy Vital Paśled ź vioski Bałašy Vilejskaha rajona ŭziaŭ sabie pazyŭny «Biełarus».
Vital Paśled naradziŭsia ŭ 1993 hodzie. Atrymaŭ prafadukacyju ŭ Vilejcy, pracavaŭ kiroŭcam i stalarom u Vilejskim rajpo. Rana ažaniŭsia, naradzilisia dvoje dziaciej.
Nie skažaš, što Vital byŭ uzornym hramadzianinam. U jaho byli śpiecyfičnyja ŭjaŭleńni ab miežach dazvolenaha.
U bazach Belpol možna znajści milicejski pratakoł z času, kali Vital byŭ 22-hadovy:
«Paśled Vital […], prykładna a 14‑j hadzinie 17.06.2015, znachodziačysia ŭ stanie ałkaholnaha apjanieńnia, u dvary […] učyniŭ skandał sa svajoj žonkaj, ciaham jakoha, dziejničajučy ź niepryjazi, majučy namier na zapałochvańnie i zastrašvańnie apošniaj, staŭ vykazvać u jaje bok i ŭ bok ich dvaich niepaŭnaletnich dziaciej pahrozy zabojstvam i, u paćviardžeńnie svaich słoŭ, abliŭ roh chaty bienzinam, u toj čas jak dzieci znachodzilisia doma, paśla čaho padpaliŭ, a praź niepraciahły čas zatušyŭ uzharańnie».
Adznačałasia, što ŭ Paśleda znajšli bajavy naboj kalibru 7,62 mm. Pa sukupnaści — za niezakonnyja dziejańni sa zbrojaj i pahrozu zabojstvam, Vital atrymaŭ paŭtara hoda chimii.
Potym jaho abviaščali ŭ Biełarusi ŭ vyšuk za niavypłatu alimientaŭ. Ad kryminalnaj spravy biełarus chavaŭsia, jak vynikaje, u Rasii.
Abstaviny viarboŭki maładoha biełarusa ŭ rasijskaje vojska nieviadomyja. Viadoma tolki, što jaho raźmierkavali ŭ šturmavy bataljon «Kiedr». Jon uziaŭ sabie pazyŭny «Biełarus». Na pieršaje bajavoje zadańnie jon pajšoŭ 1 lutaha 2026-ha. Heta było i apošnim zadańniem. Bolš jon nie adhukaŭsia i znaku pra siabie nie davaŭ. Praz dva miesiacy jaho pryznali źnikłym bieź źviestak.
Usiaho ŭ składzie rasijskaha vojska na zachopnickaj vajnie va Ukrainie zahinuła ci prapała bieź viestak užo bolš za 500 biełarusaŭ, spakušanych abiacańniami lohkaha zarobku. Jak padličyli vajennyja ekśpierty, siaredni čas žyćcia rasijskaha najomnika na froncie składaje niekalki miesiacaŭ, a ŭ šturmavych padraździaleńniach — niekalki tydniaŭ.
Ekśpierty padličyli, što ŭsiaho Rasija za čatyry hady vajny straciła kala 400 tysiač vajskoŭcaŭ zabitymi, bolš za miljon byli paranienyja.
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj42
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1818
Kamientary