U Viciebsku za «chulihanstva» zatrymali čaćviarych naziralnikaŭ. Ale potym paprasili prabačeńnia i adpuścili

U Viciebsku 5 žniŭnia, u druhi dzień daterminovaha hałasavańnia na prezidenckich vybarach, na vybarčych učastkach №12, 13 i 14 zatrymali čaćviarych naziralnikaŭ. Administracyja škoły №25, dzie znachodziacca hetyja ŭčastki, nie dazvalała im znachodzicca ŭ budynku i vyklikała milicyju. Taja skłała pratakoł za drobnaje chulihanstva i adviezła zatrymanych u RAUS. Adnak paśla razboru milicyjanty ich adpuścili, paprasili prabačeńnia i paviedamili, što ŭ budynku škoły naziralnikam znachodzicca nie zabaroniena, piša Tut.by.

Pavialičyć

U SŠ №25 na vulicy Čkałava znachodziacca try ŭčastki dla hałasavańnia: №12, 13 i 14.

Pra toje, što adbyłosia ŭ škole, Tut.by raspavioŭ adzin z zatrymanych niezaležnych naziralnikaŭ — Andrej Kiešaniuk.

— Na ŭčastku №12 siońnia ŭžo znachodzilisia try naziralniki — a bolš čałaviek, pa rašeńni CVK, na daterminovym hałasavańni być nie moža. Nam, niezaležnym naziralnikam, staršynia ŭčastkovaj kamisii Alaksiej Pancylejeŭ dazvoliŭ znachodzicca ŭ faje škoły i sačyć za tym, što adbyvajecca kala dźviarej na ŭčastak. Adnak dyrektar SŠ №25 Natalla Nikifarava paprasiła nas pakinuć budynak škoły: maŭlaŭ, my — staronnija ludzi i miašajem vybarčamu pracesu.

Andrej Kiešaniuk udakładniŭ, jakim zakanadaŭčym dakumientam dyrektarka kirujecca, zabaraniajučy naziralnikam znachodzicca ŭ škole. Natalla Nikifarava patłumačyła, što ŭnutranym režymam navučalnaj ustanovy — staronnija asoby znachodzicca tut nie pavinny. I prapanavała naziralnikam vyjści na vulicu: maŭlaŭ, siońnia dobraje nadvorje, a ŭ dvary škoły jość łaŭka.

Adnak naziralniki sprabavali adstajać svajo prava vieści nazirańnie za daterminovym hałasavańniem, i ŭ škołu vyklikali narad milicyi.

Spačatku milicyjanty sprabavali vysłuchać abodva baki kanfliktu i vyrašyć jaho. Adnak potym naziralnikam paviedamili, što ŭ dačynieńni da ich raspačata administracyjnaje raźbiralnictva pa artykule 17.1 KaAP (Drobnaje chulihanstva).

U RAUS pavieźli dvuch naziralnikaŭ z učastka №12, i pa adnym — z učastkaŭ №13 i 14.

— Pratakoły my nie padpisvali. Paśla razhladu ŭ RAUS usich čaćviarych adpuścili. Skazali, što nijakich pretenzij da nas nie majuć. Paprasili prabačeńnia za dastaŭlenyja niazručnaści i paviedamili, što my možam znachodzicca ŭ budynku škoły, što ŭ hetym niama nijakaha pravaparušeńnia, — raspavioŭ Andrej Kiešaniuk.

• 0
• 0
• 0
• 0
• 0
• 0
• 0
• 0