«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy

Biełaruskaja prapahanda abvinavaciła rahačoŭskaha aktyvista Dzianisa Daškieviča, jaki žyvie ŭ Polščy, u padrychtoŭcy zamachu na dziaciej Śviatłany Cichanoŭskaj. Sam Daškievič pryznaje: paśla atrymańnia rašeńnia ab pazbaŭleńni statusu ŭciekača jon sapraŭdy napisaŭ u pryvatnaj pierapiscy niedapuščalnuju frazu pra dziaciej demakratyčnaj lidarki. Adnak śćviardžaje, što heta było emacyjnaje paviedamleńnie, nijakich dziejańniaŭ jon nie płanavaŭ, a polskija śpiecsłužby paśla pravierki nie mieli da jaho pytańniaŭ.

Pra toje, što da historyi datyčny mienavita Dzianis Daškievič, napisali ŭ telehram-kanale Ramana Pratasieviča. Tam śćviardžałasia, što Daškievič šukaŭ infarmacyju pra miesca žycharstva Cichanoŭskaj i jaje dziaciej, a taksama nibyta razhladaŭ mahčymaść zamachu jak sposab pryciahnuć uvahu da svaich prablem. 

Daškievič u razmovie z «Našaj Nivaj» kaža, što sam daviedaŭsia pra publikacyju ad žurnalistaŭ.

— Ja krychu ŭ šoku. Ni Pratasievič, ni biełaruskija prapahandysty sa mnoj nie źviazvalisia, intervju nie prasili. Ja ŭvohule asabista nie viedaju Ramana Pratasieviča. Navošta jon heta napisaŭ, ja nie razumieju.

«Napisaŭ: «Hrochnuć, ci što, dziaciej Cichanoŭskaj?»

Daškievič nie admaŭlaje, što zhadaŭ dziaciej Śviatłany Cichanoŭskaj u pierapiscy. Pavodle jaho, heta adbyłosia paśla taho, jak jon atrymaŭ rašeńnie polskich uładaŭ ab pazbaŭleńni statusu ŭciekača.

— Ja byŭ na emocyjach i sapraŭdy napisaŭ niekalkim pravaabaroncam niešta nakštałt: «Što, hrochnuć dziaciej Cichanoŭskaj, kab źviarnuli ŭvahu na maju prablemu?» Ja heta pryznaju. Ale nijakich dziejańniaŭ nie rabiŭ: nie šukaŭ jaje, ničoha joj nie pisaŭ i nidzie publična hetaha nie vykazvaŭ.

Jon kaža, što paviedamleńni dasyłaŭ u pryvatnych čatach, u tym liku ŭdzielnikam čata «Partyzanka», da jakich źviartaŭsia pa dapamohu.

— Ja pisaŭ usim zapar, bo nie razumieŭ, što mnie rabić. Čałaviek atrymlivaje taki dakumient — i ŭśviedamlaje, što ŭ Biełarusi jaho čakaje faktyčna śmierć. Heta nie apraŭdańnie, ale ja byŭ u vielmi ciažkim emacyjnym stanie. Heta była fraza biez zadniaj dumki, a nie płan niejkich dziejańniaŭ.

Infarmacyju polskim uładam pieradali ź Biełarusi

Daškievič śćviardžaje, što pra pierapisku stała viadoma biełaruskim śpiecsłužbam. Paśla hetaha, pavodle jaho, biełaruski bok pa aficyjnych kanałach papiaredziŭ Polšču pra nibyta padrychtoŭku teraktu.

— Da mianie pryjšli supracoŭniki ABW — polskaha Ahienctva ŭnutranaj biaśpieki. Jany pakazali materyjały: biełaruski ministr pieradaŭ infarmacyju polskamu boku, što ŭ Polščy rychtujecca terakt. Majo proźvišča pieršapačatkova, nakolki ja razumieju, tam navat nie nazyvałasia, ale ŭ vyniku havorka išła pra mianie.

Daškievič pakazaŭ supracoŭnikam ABW svaje pierapiski i daŭ tłumačeńni. Pavodle jaho słoŭ, pravierka praciahvałasia niekalki dzion i ŭžo skončyłasia.

— Ja ŭsio pakazaŭ. Nakolki razumieju, paśla hetaha ŭsie pytańni byli źniatyja. Mianie nie zatrymlivali. Nijakich abvinavačvańniaŭ polskija pravaachoŭnyja orhany mnie nie vystavili.

Aficyjnaj infarmacyi ABW pra vyniki pravierki niama.

Daškievič źviartaje ŭvahu, što infarmacyja pra pazbaŭleńnie jaho statusu ŭciekača na toj momant nie była publičnaj:

— Pra heta viedali tolki ludzi, jakim ja pisaŭ i ŭ jakich prasiŭ dapamohi. Tamu ja ŭpeŭnieny, što ŭsio pačałosia mienavita z maich paviedamleńniaŭ. Jak pierapiska trapiła da biełaruskich śpiecsłužbaŭ i čamu joj pačali zajmacca na ŭzroŭni ministerstvaŭ — asobnaje pytańnie.

Čamu Daškieviča pazbavili statusu ŭciekača

Pavodle Daškieviča, historyja pačałasia jašče ŭ 2025 hodzie. Tady jaho nibyta sprabavali schilić da špijanažu na karyść biełaruskich uładaŭ. Pra heta jon sam paviedamiŭ ABW.

— Ja nie mahu raskazvać pra ŭsie abstaviny. Była sproba schilić mianie da supracoŭnictva i špijanažu na karyść Biełarusi. Ja adrazu paviedamiŭ pra heta polskaj śpiecsłužbie. Ale paśla niejkim čynam trapiŭ u śpis ludziej, jakija mohuć ujaŭlać pahrozu nacyjanalnaj biaśpiecy.

Paśla hetaha polskaje Upraŭleńnie pa spravach zamiežnikaŭ pačało praceduru pravierki, ci zachoŭvajucca padstavy dla statusu ŭciekača. Daškievič nakiravaŭ tudy tłumačeńni i dakumienty pra kryminalny pieraśled u Biełarusi:

— Ja dasłaŭ vypiski pa kryminalnych spravach i patłumačyŭ, čamu viartańnie ŭ Biełaruś dla mianie niebiaśpiečnaje. Ale ŭ lipieni atrymaŭ rašeńnie, što statusu ŭciekača mianie pazbavili.

Daškievič źbirajecca abskardžvać hetaje rašeńnie z dapamohaj pravaabaroncaŭ.

Pavialičyć

Dzianis Daškievič — aktyvist z Rahačova, jon bolš za dziesiać hadoŭ kiravaŭ rehijanalnym resursam «Rahačoŭ Anłajn». Imidž u jaho byŭ nieadnaznačny — naprykład, Daškievič paklopničaŭ na pravaabaroncu Leanida Sudalenku. A paśla Daškieviča ŭziali na pracu ŭ dziaržaŭny Dom kultury. Były aktyvist źjechaŭ ź Biełarusi ŭ 2022 hodzie. U 2023 hodzie ŭ Biełarusi suprać jaho raspačali kryminalnuju spravu za «abrazu» Alaksandra Łukašenki.

Čytajcie:Chto taki Dzianis Daškievič, jaki admaŭlajecca ad biełaruskaha hramadzianstva? Adkazać na hetaje pytańnie niaprosta

• 0
• 0
• 6
• 33
• 0
• 2
• 3
• 0