Doktar BCHMD: U Ramana Bandarenki było nul pramile ałkaholu, naohuł ničoha nie znajšli
Siońnia Śledčy kamitet zajaviŭ, što ŭ zahinułaha Ramana Bandarenki dyjahnastavali «ałkaholnuju intaksikacyju». Daktary balnicy chutkaj miedycynskaj dapamohi i miedycynskija dakumienty hetuju infarmacyju abviarhajuć.
— U Ramana było nul pramile ałkaholu, naohuł ničoha nie znajšli, — kamientuje Tut.by adzin z daktaroŭ BCHMD.
Siońnia ranicaj Śledčy kamitet zajaviŭ, što pa fakcie hibieli Ramana Bandarenki pravodzicca pravierka.
«Minčuk byŭ ahledžany miedykami, paśla čaho špitalizavany va ŭstanovu achovy zdaroŭja, dzie pry pieršasnym ahladzie razam ź cialesnymi paškodžańniami ŭ jaho dyjahnastavanaja ałkaholnaja intaksikacyja» — havorycca ŭ aficyjnaj zajavie SK.
Jość dakumient pieršasnaha ahladu doktara ŭ pryjomnym adździaleńni. Tam u dyjahnazie akramia zakrytaj čarapnoj mazhavoj traŭmy, vostrych subduralnych hiematom, udaraŭ, ranak, pakazana: «Ałkaholnaja intaksikacyja? Aśpiracyjnaja pnieŭmanija?». Heta miedykam stavicca pad pytańnie.
— Heta papiaredni dyjahnaz. Pacyjent pastupiŭ z vanitavymi masami, ciapier užo zrazumieła: heta ad taho, što była hiematoma ŭ hałavie, — tłumačyć doktar. — Ale pry pieršasnym ahladzie i biez analizaŭ ciažka skazać. Kali čałaviek pastupaje ŭ sopary abo komie, składana skazać, čamu jon u takim stanie. Ci jamu nadavali pa hałavie, ci jon napiŭsia i ad hetaha trapiŭ u komu. Tamu ałkaholnaja intaksikacyja stavicca pad pytańniem, heta papiaredni dyjahnaz. Pakul my ličym tak, niama ž nijakich daśledavańniaŭ, i tolki paśla ŭsich analizaŭ stavicca dakładny dyjahnaz.
U Ramana ŭ zaklučnym dyjahnazie etanołu nul, nijakaha ałkaholnaha apjanieńnia nie było.
U Tut.by jość dakumienty, jakija paćviardžajuć słovy doktara.
Žurnalist Mancevič, błohiery Kazłoŭ i Vinahradaŭ, palityk Kučuk. paplečniki Aŭtuchoviča i Statkieviča. Chto jašče z palitviaźniaŭ vyzvaliŭsia siońnia?22
Kamientary