U kamandzie Łatuški źjaviŭsia adkazny za harady-pabracimy. Ci važny heta kirunak?

Pra isnavańnie instytuta pabracimstva miž haradami viedaje, mabyć, kožny, ale, zdajecca, heta nie samy pryjarytetny kirunak dziejnaści. Dyk dla čaho NAU patrebny taki čałaviek?

«Naša Niva» pacikaviłasia pra heta ŭ samoha spadara Ivačova, a taksama kiraŭnika kamandy, što adkazvaje za źniešniuju palityku i handal u NAU, — Anatola Kotava.

Pavialičyć

Alaksandr Ivačoŭ rodam z rasijskaha Uładzivastoka. Kaža, što pa maładości chipavaŭ, i kali jaho vyhnali z univiersiteta na radzimie, to pajechaŭ u Brest. Tut pastupiŭ na vučobu nanoŭ, paźniej znajšoŭ žonku, pabudavaŭ karjeru i siamju. Z adukacyi Ivačoŭ architektar, ale papracavaŭ u hetaj śfiery zusim niamnoha.

U 90-ja pad kantrolem Ivačova było niekalki turystyčnych firmaŭ, zajmaŭsia i inšym biznesam, u tym liku budaŭničym. Apošnija hadoŭ dziesiać zasiarodziŭsia na hramadskaj dziejnaści: heta i Sajuz pradprymalnikaŭ, i Centr sadziejničańnia raźvićciu ahraturyzmu, zasnavaŭ asacyjacyju «Bresckaja haścinnaść», a taksama hramadskuju arhanizacyju «Pabracimy Brest — Šusiental».

Kali ŭ Biełarusi ŭ žniŭni pačalisia važnyja palityčnyja padziei, to Ivačoŭ byŭ siarod tych, chto adrazu padtrymaŭ ludskoje paŭstańnie. Praz što i vymušany byŭ źjechać za miažu ŭ vieraśni 2020 hoda.

Ivačoŭ — heta toj muzyka, jaki vykonvaŭ na fartepijana «Śviaščennuju vajnu» i inšy repiertuar, kali pratestoŭcy chadzili ŭ Breście pa vulicy Savieckaj. Na bałkonie ŭ Ivačova visieŭ płakat «Muzyka z narodam». Samaje cikavaje, što na fartepijana jon navučyŭsia hrać tolki ŭ 56 hadoŭ, u pamiać ab pamierłaj žoncy, jakaja jakraz i vučyła ludziej muzycy. Kaža, tak lahčej pieranosić stratu lubimaha čałavieka. Paśla takich niadzielnych kancertaŭ u mužčyny pačalisia prablemy, jaho vyklikali ŭ milicyju.

Spačatku Ivačova prytulili ŭ siabie niamieckija siabry, ź jakimi jon padtrymlivaje kantakt užo paru dziesiacihodździaŭ, a potym jon napisaŭ kancepcyju raźvićcia haradoŭ-pabracimaŭ, jakuju nakiravaŭ u NAU. Tam ideja pryjšłasia daspadoby, tamu Ivačova zaprasili ŭ kamandu.

«Jašče 30 hadoŭ tamu ja ŭdzielničaŭ u pryniaćci ŭ Breście pieršaj niamieckaj delehacyi — z Raviensburha i Vajnhartena, tak i zacikaviŭsia temaj, — kaža jon. — Časta byvaje, što administracyi našych haradoŭ zaklučajuć pahadnieńnie ab pabracimstvie, ale ŭsio heta skančvajecca tolki biudžetnym turyzmam u tyja miaściny, a treba, kab hety instytut prynosiŭ vyniki».

Alaksandr Ivačoŭ miarkuje, što na prykładzie haradoŭ-pabracimaŭ žychary Biełarusi mohuć vučycca funkcyjanavańniu na Zachadzie hramadzianskaj supolnaści, padtrymki łakalnych inicyjatyŭ, a ŭ pierśpiektyvie i pieraniaćcia dośviedu miascovaha samakiravańnia. «Heta ž vydatna, kali našy ludzi ź niamieckimi partniorami zmohuć znutry pahladzieć, jak funkcyjanujuć harady, jak farmirujecca hramadzianskaja supolnaść tam. Heta krajnie važna dla stratehičnaha raźvićcia Biełarusi».

Ci mahčyma tut adabrać inicyjatyvu ŭ har- i rajvykankamaŭ, jakija zvyčajna takija pahadnieńni i zaklučajuć? Ivačoŭ upeŭnieny, što tak. I dla ilustracyi pryvodzić svoj prykład rehistracyi hramadskaha abjadnańnia «Pabracimy Brest — Šusiental». Dziakujučy hetamu abjadnańniu ŭ Breście prachodzili muzyčnyja fiestyvali, inšyja kulturnickija mierapryjemstvy. Pryčym inicyjatyva padtrymlivałasia nie tolki niamieckim bokam, ale i polskim konsulstvam.

Kali ŭ žniŭni ŭ Biełarusi pačalisia aryšty, źbićcio i hvałt nad ludźmi, to Ivačoŭ nakiravaŭ listy ŭ harady, jakija źjaŭlajucca pabracimami z Brestam. Vielmi chutka adreahavali ŭ niderłandskim Kuvierdenie, dzie nad ratušaj vyviesili bieł-čyrvona-bieły ściah, a potym dałučylisia i harady niamieckaha poŭdnia. Usie jany zaklikali spynić hvałt i pravieści spraviadlivy padlik hałasoŭ. Tak što Ivačoŭ upeŭnieny, što pierachapić tut inicyjatyvu va ŭładaŭ całkam mahčyma.

Anatol Kotaŭ taksama ličyć, što heta «kłasnaja reč». «I hladzieć na temu haradoŭ-pabracimaŭ možna praz vuhał dapamohi, jakuju ludzi tam mohuć akazvać biełarusam. Naprykład, niejki muzyčny hurt vymušany źjechać praź pieraśled u Biełarusi, i im z radaściu dapamohuć u horadzie-pabracimie ich nasielenaha punktu. Nie treba zabyvacca, što ŭ Jeŭropie harady — heta asobnyja adzinki, z ułasnym biudžetam. 7 lutaha budzie adznačacca Dzień salidarnaści ź Biełaruśsiu, i kali harady-pabracimy dałučacca masava da hetaj akcyi, to budzie vielmi fajna».

• 0
• 0
• 0
• 0
• 0
• 0
• 0
• 0