Ciacieryn syšoŭ z pasady staršyni fiederacyi tenisa. Heta značyć bolš, čym zdajecca — što viadoma pra tajemnaha aliharcha?
Siarhiej Ciacieryn syšoŭ z pasady staršyni fiederacyi tenisa. Pres-słužba kaža, što pryčyna ŭ kiepskich vynikach tenisistaŭ na Alimpijadzie. Ale taki samy vynik u mnohich inšych spartoŭcaŭ, a staršyni ich fiederacyj pakul na miescy. Moža, sprava nie tolki ŭ hetym?
Najpierš, chto taki Siarhiej Ciacieryn?
Jaho historyja pośpiechu naŭrad ci b adbyłasia, kali b u eks-prezidenta Rasii Barysa Jelcyna nie było «svajho» treniera pa tenisie — Šamila Tarpiščava.
Zvyčki Maskvy pierajmaŭ i Minsk, tamu ŭ Alaksandra Łukašenki taksama źjaviŭsia piersanalny tenisist Siarhiej Ciacieryn, jaki potym raskryŭsia jašče i jak asabisty masažyst.
Kali Ciacieryn uvajšoŭ u bližniaje koła Łukašenki, to staŭ atrymlivać dziaržaŭnyja pasady, jon vučyŭ čynoŭnikaŭ mienš pić, bolš času pryśviačać dziaržaŭnym spravam i staŭ sam upłyvać na dziaržaŭnyja spravy. U 2017 hodzie Ciacieryn uznačaliŭ fiederacyju tenisa, zamianiŭ na pasadzie miljaniera Alaksandra Šakucina.
Z takoj rabotaj jon atrymaŭ uvachod u mižnarodnyja tenisnyja koły, dzie kali-nikali sustrakajucca asoby karaleŭskaj kryvi.
U biełaruskich realijach sport — heta instrumient źniešniaj i ŭnutranaj palityki. Pasady staršyń fiederacyj nie dajucca aby-kamu. Hałoŭny sens u tym, što čałaviek na čale fiederacyi sapraŭdy pavinien «zajmacca» svaim sportam. Heta mahčyma, kali inšyja śfiery intaresaŭ užo pastaŭlenyja i nie vymahajuć vialikaj uvahi, a kali ty tolki raźvivaješsia abo biznes praz sankcyi pačynaje sypacca, — tut užo nie da tenisa.
Imavierna, Ciacieryn sam razumieŭ, što zapuściŭ svaju śfieru adkaznaści — usie tenisisty z Alimpijady vylecieli. U suviazi z sankcyjami šmat uvahi ŭ jaho adymaje biznes.
Ciapier jaho biznes-intaresy nadzvyčaj šyrokija. Jon paśpieŭ pakinuć śled i ŭ meblevaj śfiery, i ŭ prodažy praduktaŭ i ałkaholu, i ŭ restarannym biznesie.
Ciapier mierkavańni biznes-kołaŭ sychodziacca na tym, što biznesy Ciacieryna nie vyhladajuć zvyšprybytkovymi, niekatoryja prynosiać prablemy, a sam jon azirajecca na los Čyža, bo sutyknuŭsia z mocnaj apazicyjaj «pry dvary».
Televizijščyki ličyli Ciacieryna adnoj z hałoŭnaj svaich prablem, bo jon doŭhi čas zdymaŭ viarški z rynku telerekłamy. Kiraŭnictva kanałaŭ z dapamohaj Ministerstva infarmacyi doŭhi čas sprabavała pieranakiravać finansavyja płyni bližej da kanałaŭ, kab zarablać bolš i rabić bolš ułasnaha kantentu. U vyniku heta zbolšaha atrymałasia, praŭda, na jakaść kantentu naŭradci paŭpłyvała.
U praŭładnych telehram-kanałach užo nie pieršy miesiac piasočać kampanii, kančatkovym bieniefiecyjaram jakich ličycca Ciacieryn.
Cikava, što ŭ 2020‑m jahonaja dačka padtrymała ruch za pieramieny, a jaho tavaryšy z asacyjacyi vieteranaŭ KDB źviarnulisia da kiraŭnictva siłavych orhanaŭ z patrabavańniem spynić hvałt.
Kamientary