Reštki «Vahniera» na čale z synam Pryhožyna stvaryli narkaimpieryju ŭ CAR

Reštki rasijskaj PVK «Vahnier» stvaryli ŭ Centralnaafrykanskaj Respublicy (CAR) narkaimpieryju, zasnavanuju na tramadole. Heta abiazbolvalnaje, jakoje ŭ vysokich dozach dziejničaje jak mocny stymulatar, jaho nazyvajuć «kakainam dla biednych». Kiruje ŭsim syn Pryhožyna, raskazvaje The Wall Street Journal.

Rekamiendavanaja doza tramadoła — 50—100 mh, ale ŭ CAR šyroka pradajucca tabletki pa 200 mh i vyšej.

Heta abiazbolvalnaje ŭžyvajuć šachciory na załatych pryiskach vahnieraŭcaŭ, kab pracavać doŭhimi hadzinami. Bajeviki prymajuć vysokija dozy pierad bojem, kab padavić strach i pavysić ahresiju.

Paśla hibieli Pryhožyna i pahłynańnia bolšaj častki «Vahniera» rasijskaj dziaržavaj, u viarchoŭjach raki Ubanhi zastajecca da 500 bajcoŭ hrupy. Praz kantrol nad handlem tramadołam jany ŭtrymlivajuć kantrol nad lasnymi i załatymi resursami krainy — pavodle acenki Global Initiative, dachod ad nielehalnaha ekspartu zołata składaje $180 młn za hod, plus dadatkovy dachod ad kantrabandy narkotyku.

Zaraz hrupu tam uznačalvaje Pavieł Pryhožyn, syn zasnavalnika Vahniera.

Tramadoł u asnoŭnym vyrablajecca ŭ Indyi, ekspartujecca firmam u Konha (aficyjna jak zvyčajnyja dozy pa 50 mh, ale z prymieškaj vysokadozavych tabletak). Dalej kantrabandysty pierapakoŭvajuć jaho i pierapraŭlajuć z Kinšasy ŭ pryhraničny horad Zonha, a adtul praz raku Ubanhi — u CAR, dzie jon svabodna pradajecca ŭ kramach Banhi. Cana na preparat vyrasła ŭtraja za apošni hod.

Pry pieraprodažy ŭ Kamierun partyja koštam $7000 moža prynieści da $21 000, choć kantrabandystam davodzicca płacić kala $4000 chabaru vahnieraŭcam i sajuznym uzbrojenym hrupam.

U lutym minułaha hoda pravahnieraŭskaje apałčeńnie zabiła kala 130 fułani-žyviołahadoŭcaŭ — samy śmiarotny napad na cyvilnych z sakavika 2022 hoda.

Niekalki źviazanych z «Vahnieram» hrup («Sharks», «Black Russians») patrulujuć Banhi, zapałochvajučy prychilnikaŭ apazicyi — u tym liku pierad minułahodnimi prezidenckimi vybarami, jakija trecim razam vyjhraŭ prezident Tuadera.

Ekśpierty adznačajuć, što adnosnaja izalavanaść i małaja stratehičnaja značnaść CAR dazvalajuć «Vahnieru» dziejničać amal biez uvahi zvonku — u adroźnieńnie ad Mali ci Mazambika, dzie jość realnyja pahrozy z boku hrupovak, źviazanych ź ID.

Daśledčyki aścierahajucca, što «Vahnier» moža ŭzmacnić chaos u rehijonie — asabliva ŭ Sudanie, dzie miaciežnyja Siły chutkaha reahavańnia (RSF) umacoŭvajucca na poŭdni i zachadzie krainy, niedaloka ad miažy z CAR, i vahnieraŭcy ŭžo zachodziać u Darfur u kaardynacyi z RSF.

• 0
• 0
• 0
• 0
• 0
• 0
• 1
• 0