«Mužčyny prasili pamacać». Minskaja dyzajnierka vyrablaje epatažnyja sumki z žanočymi hrudźmi FOTY
Dyzajnierka sumki raskazvaje, jak prydumała reč, ad jakoj u zachapleńni i i žančyny, i mužčyny. Sisi bag — tak nazyvajecca heta niezvyčajnaja madel.
Dyzajnierku zavuć Alaksandra Jakutovič. Jana vučyłasia na mastaka-dyzajniera ŭ minskim architekturna-budaŭničym kaledžy, paśla — u Akademii mastactvaŭ na telerekłamie.
«Mnie chaciełasia zajmacca kampjutarnaj hrafikaj, ale pakul ja tam navučałasia, pačała rabić štości svaimi rukami. U mianie mama švačka, ale ja nikoli nie chacieła pracavać, jak jana. Bačyła, jak heta ciažka: mama časta na dom pracu prynosiła, i ja, kali maleńkaja była, joj dapamahała.
Kali ja vučyłasia ŭ Akademii, była moda na valeńnie z šerści. Ja pačała valać cacki, zavušnicy. Paśla bolš bujnyja rečy — tapački, šapki i navat sukienki. Potym moda na šerść prajšła, dy j mnie ŭžo było niecikava. Vyrašyła sprabavać pracavać sa skuraj, bo heta materyjał, jaki daje šmat mahčymaściaŭ», — raskazvaje dziaŭčyna, jak stała šyć sumki.
«Na dziadziu» jana pracavała tolki adnojčy — paśla kaledža ŭładkavałasia na try miesiacy na «Kamunarku». Tam na leta nabirajuć časovych rabočych, kab rychtavać padarunki da Novaha hoda. Alaksandra bolšaść času praviała ŭ cukieračnym adździele, dzie ŭručnuju ŭpryhožvali cukierki šakaładam i pakavali ŭ vialikija karobki.
Nazva jaje brenda sumak Holywool — hulnia słoŭ Holywood i wool (šerść) — zastałasia jašče z taho času, kali dziaŭčyna zajmałasia valeńniem. Prydumlajučy novyja madeli, Alaksandra sočyć za modaj, ale z usiaho patoku vybiraje toje, što blizka joj.
«Mianie časam ludzi prosiać zrabić štości na zamovu — ja zaŭsiody admaŭlaju. Ja nie atelje, mnie chočacca realizoŭvać svaje idei. I ja nie rablu kopii inšych brendaŭ, bo heta pytańnie etykietu.
Liču, kali vy chočacie brendavuju sumku, vy pavinny jaje kupić. A kali vy voźmiecie padrobku pad jaje, navat dobraj jakaści, vy nie atrymajecie toje, što chočacie, — pryčynnaść da hetaha brenda. Sens tady kuplać kopiju?»
Madel sisi bag dyzajnierka vypuskaje druhi hod. Žanočy biust vyrazany z moranaha duba — dziaŭčyna ŭlubiłasia ŭ fakturu hetaha čornaha dreva.
«Heta adsyłka da Vieniery Miłoskaj. Ja spačatku dumała pra jaje hrudzi, ale zrabić ich kopiju było niemahčyma: jany niesimietryčnyja, sama Vieniera ŭ nachilenaj pozie. Tamu vyrašyli, što patrebna svaja madel. 3D-mastak zrabiŭ jaje, i my stali na freziernym stanku vyrazać hetyja hrudzi.
Pieršuju sumku zrabiła sabie. I pamiataju, što na vulicy jana vielmi pryciahvała ŭvahu. Usie chacieli pamacać (uśmichajecca). I dahetul tak adbyvajecca. Ludzi kazali, što vyhladaje niestandartna, što nikoli takoha nie bačyli — mnie padabałasia heta reakcyja. Mužčyny taksama prasili bližej razhledzieć i pamacać.
Mnohija zakazvali takuju madel, ale biez hrudziej, bo nie mahli sabie ŭ zvyčajnym žyćci dazvolić nasić takoje. Chtości pracuje ŭ ofisie z dreskodam, chtości saromiejecca».
Ciapier heta samaja papularnaja sumka z kalekcyi. Jaje časta zakazvajuć z-za miažy — biełarusy, jakija pierajechali ŭ Francyju, Hiermaniju, ZŠA, Aŭstraliju.
Alaksandra sama amatar sumak. Kolki ich u jaje asabistaj kalekcyi, dziaŭčyna nie padličvała.
«Ja starajusia kožnuju svaju madel sama nasić, kab zrazumieć, jakija plusy i minusy, dapracoŭvaju paśla. Pierarablaju sumki pa niekalki razoŭ, pakul nie atrymaju kančatkovy varyjant. Ale ja nie danošvaju ich da drennaha stanu, šmat addaju znajomym ci zdaju ŭ «Kaliłasku».
Ličycca, što ŭ kožnaj žančyny musić być maleńkaja čornaja sukienka. A što nakont sumak?
«Ja dumała pra heta, ale žančyny takija roznyja! — kaža dyzajnierka. — Chtości lubić rukzaki, kab ruki byli svabodnyja, a chtości nie zusim zručnyja sumki, ale jakija efiektna hladziacca».
Ciapier čytajuć
Były viadučy BT, jaki zvolniŭsia ŭ 2020-m i vyjechaŭ u Słavakiju, raskazaŭ, jak žyvie ciapier2
Kamientary