Da $2000 za mietr, i heta nie Minsk. Što za novabudoŭla ŭ Breście, praź jakuju spračajucca haradžanie?
«Dom na Mašerava» staŭ pradmietam abmierkavańnia siarod žycharoŭ Bresta ź niekalkich pryčyn: vysoki (pa sutnaści, minski) košt mietra, jaki dachodzić amal da $2000, a taksama skandał sa znojdzienymi ŭ pracesie budoŭli pachavańniami viaźniaŭ hieta. Jakim abjekt atrymaŭsia ŭ vyniku, piša Onliner.
Pieršapačatkova na łasym z punktu hledžańnia inviestycyj učastku ŭ samym centry Bresta haspadaryŭ inšy zabudoŭščyk, a pabudavać jon mieŭ namier žyły kompleks «Prybužski kvartał». Adnajmiennaja staronka ŭ Instagram źjaviłasia jašče ŭ 2018 hodzie.
Raniejšy zabudoŭnik i nie dumaŭ admaŭlacca ad svaich płanaŭ. Raboty na placoŭcy vialisia, ale rezka spynilisia ŭ 2019 hodzie praz strašnuju znachodku.
Vyjaviłasia, što dziesiacihodździami ŭ hetaj ziamli lažali pareštki 1214 čałaviek. Reč u tym, što ŭ hady vajny tut znachodziłasia hieta, dzie ŭtrymlivałasia ad 20 da 27 tysiač jaŭrejaŭ.
«Kali pačynalisia budaŭničyja raboty, my mierkavali, što tut mohuć lažać pareštki viaźniaŭ hieta. I hetaje pytańnie asobna abmiarkoŭvałasia z zabudoŭščykam. Ale nichto i vykazać zdahadku nie moh, što ich budzie tak šmat», — tak kamientavaŭ situacyju tahačasny staršynia Bresckaha harvykankama Alaksandr Rahačuk.
Paśla hetaha da pracy prystupili bajcy 52‑ha asobnaha śpiecyjalizavanaha pošukavaha bataljona Minabarony, jakija padniali i pierapachavali pareštki. Budaŭnictva prypyniłasia, i ŭłady skasavali inviestdamovu z zabudoŭščykam.
Praź niekatory čas placoŭku znoŭ vystaŭlali na aŭkcyjon. Novym pakupnikom stała kampanija «AjranInviestPrajekt».
— Hety abjekt my nabyli praz aŭkcyjon, jaki pravodziŭ Brescki haradski vykanaŭčy kamitet, — raskazvaje kiraŭnica prajekta Alena. — Aŭkcyjon prajšoŭ 22 lutaha 2022 hoda. Kali my nabyli plac, na im užo raźmiaščałasia niezavieršanaja niekansiervavanaja pabudova ŭ vyhladzie fundamienta. To-bok habaryty, paramietry doma ŭžo byli zadadzienyja. Historyi z pareštkami naša kampanija nie zakranuła — usio było abśledavana i pierapachavana da nas.
Nieakłasika i stylizacyja pad histaryčnuju zabudovu
U vieraśni 2025‑ha dom byŭ zdadzieny ŭ ekspłuatacyju. Novabudoŭla pakul staić nieabžytaj, ale prodažy ŭžo adkrytyja.
Manalitna-karkasny dom na praśpiekcie Mašerava, 58 atrymaŭsia nievysokim — usiaho čatyry pavierchi plus mansarda. U čatyroch siekcyjach raźmiaścili 93 kvatery.
Dvarovaja terytoryja zakrytaja. Dvor atrymaŭsia nietypova vialikim dla centra horada: jaho raznastaili hazonami, altankami, viełaparkoŭkaj, zonaj dla varkaŭtu i dziciačaj placoŭkaj. Dla žylcoŭ praduhledžana 60 parkovačnych miescaŭ pad šłahbaŭmam. Košt adnaho mašyna-miesca — $5500.
Płaniroŭki i ceny
Varyjantaŭ płanirovak mnostva: jość jak kampaktnyja studyi płoščaj 36,6 kv. m, tak i prastornyja čatyrochpakajoŭki płoščaj 119,10 «kvadrata».
— Kala 30% kvater u domie ŭžo vykuplena, — adznačaje Michaił, markietołah kampanii. — Siarod pakupnikoŭ jość jak žychary Bresta, tak i minčanie.
Samaje cikavaje — ceny. Jany tut zusim jak u Minsku. Studyi: ad $1900 za kvadratny mietr. Jeŭradvojki: ad $1850 za mietr. 3– i 4-pakajovyja: ad $1650 za mietr.
Naprykład, kvateru płoščaj 106,9 «kvadrata» možna kupić za $176 385. Samaja maleńkaja studyja kaštavaćmie prykładna $80 000.
U kampanii padkreślivajuć, što ciapier u histaryčnym centry Bresta naohuł niama inšych prapanoŭ novabudoŭlaŭ. Brest viadomy tym, što zdymnyja kvatery tut davoli darahija z-za blizkaści miažy i cikavaści turystaŭ (u tym liku rasijan) da Bresckaj cytadeli i Biełaviežskaj puščy. Košt arendy moža dasiahać 400 rubloŭ za dzień.
Ciapier čytajuć
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»2
Kamientary
Asobna “spadabalisia" padjezdnyja dźviery ŭ doł, što adčyniajucca navonki: ranicaj vychodziš -- zarazom śnieh adhrabajecca!