Ad fizruka da kiraŭnika. Piać faktaŭ pra novaha ministra handlu i antymanapolnaha rehulavańnia
Alaksiej Bahdanaŭ, jakoha siońnia pryznačyli ministram handlu i antymanapolnaha rehulavańnia, prajšoŭ šlach ad treniera pa karate da čynoŭnika. Raskazvajem, što pra jaho viadoma.
Majstar sportu pa karate
Bahdanavu 48 hod, jon minčuk. Pieršuju adukacyju atrymaŭ va Univiersitecie fizkultury.
Doŭhi čas jaho žyćcio było źviazanaje sa sportam. Piać hod paśla «vyški» mužčyna pracavaŭ trenieram u Biełaruskaj fiederacyi tradycyjnaha karate-do. Jon majstar sportu mižnarodnaha kłasu.
Potym vykładaŭ na spartyŭnych kafiedrach va Univiersitecie fizkultury i ŭ pryvatnym Mižnarodnym humanitarna-ekanamičnym instytucie. U apošnim jon paralelna vyvučaŭ pravaznaŭstva.
Pracavaŭ u sielskaj haspadarcy
U 2008 hodzie Bahdanava zaniesła ŭ sielskuju haspadarku. Na ahrakambinacie «Dziaržynski» jon pačynaŭ načalnikam adździeła źniešniešnieekanamičnaj dziejnaści i daros da namieśnika hienieralnaha dyrektara pa pierapracoŭcy i handlu.
Paśla pierajšoŭ u «Miasa-małočnuju kampaniju». Hod zajmaŭ tam kresła namieśnika hiendyrektara.
U Ministerstva sielskaj haspadarki i charčavańnia Bahdanaŭ trapiŭ u 2014 hodzie. Pracavaŭ načalnikam hałoŭnaha ŭpraŭleńnia źniešnieekanamičnaj dziejnaści. Namieśnikam ministra jon pabyŭ krychu bolš za paŭhoda (na hetuju pasadu jaho pryznačyli ŭ krasaviku).
Jak i bolšaść čynoŭnikaŭ, atrymaŭ dadatkova dva dypłomy ŭ Akademii kiravańnia. Bahdanaŭ vyvučaŭ tam mižnarodnyja adnosiny i suśvietnuju ekanomiku.
Žonka — trenierka pa karate
Čynoŭnik žanaty, vychoŭvaje traich dziaciej. Žonka Viktoryja taksama vučyłasia ŭ fizkulturnym, pracuje trenierkaj pa karate. Razam para 19 hod.
Sam Bahdanaŭ sport, darečy, nie kinuŭ. Paru tydniaŭ tamu znoŭ uznačaliŭ fiederacyju karate.
Člen «Biełaj Rusi»
Jon člen praŭładnaj «Biełaj Rusi», aktyŭna ŭdzielničaje ŭ ich mierapryjemstvach.
U Fejsbuku dziaržsłužačy ŭ asnoŭnym publikuje fota z pracoŭnych pajezdak. Časam adkazvaje na krytyku. Niadaŭna ŭ kamientaryjach jamu skardzilisia, što padaražeła miasa.
«Kaniečnie. Usio ž padaražeła, što ŭpłyvaje na sabiekošt vytvorčaści. Ale na ŭnutranym rynku ceny jašče trymajem. Na ekspart daražej!» — adkazaŭ jon.
Admaŭlaŭ upłyŭ sankcyj
Na pastu namieśnika ministra Bahdanaŭ vykazvaŭsia nakont jeŭrapiejskich sankcyj.
«Biełaruś dyviersifikała svoj źniešniehandlovy pakiet takim čynam, kab niemahčyma było niejkaj krainie suprać nas niešta zrabić. I nijakija sankcyi na nas nie paŭpłyvajuć», — zajaŭlaŭ jon.
Na novaj pasadzie čynoŭniku daručyli «padviešvać» ceny. Na naradzie Łukašenka skazaŭ jamu, što ludzi ŭ nas niebahatyja, tamu treba vykarystoŭvać antymanapolnyja ryčahi, kab trymać ceny ŭ prymalnym dyjapazonie.
Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie4
Kamientary