Ambasada Francyi nie pa ŭłasnym žadańni zakryła ŭ Minsku svaju miedyjateku, jakaja pracavała 30 hadoŭ
U žniŭni 2026 hoda ŭ Minskaj abłasnoj biblijatecy imia Puškina paśla 30 hadoŭ pracy kančatkova zakryłasia francuzskaja miedyjateka — Franka-biełaruskaja zała infarmacyi pra sučasnuju Francyju, piša vydańnie «Pozirk».
Jak paviedamili ŭ francuzskaj ambasadzie, na praciahu troch dziesiacihodździaŭ miedyjateka była placoŭkaj dla znajomstva z francuzskaj movaj, kulturaj i sučasnaj Francyjaj. Tut prachodzili muzyčnyja, mastackija i fiłasofskija sustrečy, kinapakazy, vystavy i hulni. Zała taksama spryjała vyvučeńniu francuzskaj movy dziećmi.
Z paviedamleńnia francuzskaha dyppradstaŭnictva vynikaje, što zakryćcio maje palityčnyja pryčyny. U ambasadzie vykazali škadavańnie, što prajekt, jaki isnavaŭ na praciahu 30 hadoŭ i byŭ nakiravany vyklučna na kulturnaje supracoŭnictva, u vyniku staŭ niepažadanym dla biełaruskich uładaŭ.
Pradstaŭniki Francyi spadziajucca, što hetaje raźvitańnie budzie tolki časovym. U ambasadzie padkreślili, što abmiežavańni i pazbaŭleńnie dostupu da kultury tolki pavialičvajuć cikavaść da jaje.
Pra zakryćcio miedyjateki jašče 14 lipienia, padčas pryjomu z nahody nacyjanalnaha śviata Francyi, rezka vykazaŭsia tahačasny pavierany ŭ spravach Francyi ŭ Biełarusi Ludavik Ruaje. Jon zajaviŭ, što źjazdžaje ź Biełarusi z adčuvańniem niezavieršanaści, u tym liku praz zakryćcio miedyjateki, jakaja stała vynikam tryccacihadovaha supracoŭnictva ź biblijatekaj imia Puškina.
Ruaje nazvaŭ hetaje rašeńnie asabliva niezrazumiełym na fonie sprob adnavić dyjałoh pamiž Francyjaj i Biełaruśsiu. Jon taksama adznačyŭ, što vyvieści dvuchbakovyja adnosiny ź ciapierašniaha tupika budzie nadzvyčaj składana.
Pry hetym baki praciahvajuć zajaŭlać pra nieabchodnaść zachoŭvać kanały kamunikacyi. 6 žniŭnia padčas sustrečy Ruaje z byłym ministram zamiežnych spraŭ Biełarusi, staršynioj pastajannaj kamisii Savieta Respubliki ŭ mižnarodnych spravach i nacyjanalnaj biaśpiecy Siarhiejem Alejnikam havaryłasia pra važnaść adkrytych kantaktaŭ, uzajemnaj pavahi i zachavańnia kulturna-humanitarnych suviaziaŭ pamiž dźviuma krainami.
U Biełarusi aryštavali francuzskaha adstaŭnoha vajskoŭca, jaki zachaplajecca ciahnikami. Užo try miesiacy jon u SIZA
«Davieranaja asoba Makrona, jakaja pryjedzie ŭ Minsk», akazałasia adstaŭnym pasłom, što pabyvaje na «Minskim dyjałohu»
U Francyi źnik 41‑hadovy biełarus Siarhiej Siarmiažka. Šukajuć užo dva tydni
Kamientary