Byłaja ŭdzielnica Pussy Riot raskazała, što jaje pad pahrozaj źniavoleńnia zavierbavała FSB. Ź jaje dapamohaj chacieli zabić vydaŭca «Miedyjazony»
Byłaja ŭdzielnica hrupy Pussy Riot Ryta Fłores pryznałasia, što bolš za try hady była vymušanaja supracoŭničać sa śpiecsłužbami, piša Port. FSBšniki pahrozami prymušali jaje źbirać infarmacyju na sučasnych mastakoŭ i palityčnych aktyvistaŭ. A Piatra Viarziłava ź jaje dapamohaju chacieli zabić.
Byłaja ŭdzielnica Pussy Riot Ryta Fłores raskazała, što ŭ lutym 2023 hoda paśla pieratrusu ŭ kvatery pad pahrozaj zabojstva jaje siamji i kryminalnaha pieraśledu jaje zavierbavała FSB. Z taho času jana była ahientkaj śpiecsłužby pad psieŭdanimam «Charlej», a jaje kurataram byŭ supracoŭnik pa imieni Ivan.
Fłores kaža, što padčas pieratrusu supracoŭniki FSB pahražali joj, u tym liku za dopisy pra zabojstvy ŭ Bučy. Joj zajavili, što kali jana admovicca supracoŭničać, to moža «biasśledna źniknuć». Paźniej jaje advieźli ŭ sakretny ofis FSB, dzie prymusili padpisać dakumienty ab supracoŭnictvie.
Spačatku Fłores atrymała śpis sučasnych mastakoŭ z Rasii i susiednich krain i pavinna była źbirać na ich daśje: dzie jany žyvuć, z kim siabrujuć, jakija majuć zvyčki, prablemy, słabaści i asabistyja suviazi. Pavodle jaje, FSB asabliva cikaviła toje, što možna było b vykarystać dla šantažu abo zaviadzieńnia kryminalnaj spravy.
Dla suviazi joj vydali asobny Android-telefon z SIM-kartaj, aformlenaj na čužoha čałavieka. Paźniej na jaje ŭłasny telefon ustalavali prahramu sačeńnia. Fłores śćviardžaje, što pieršy hod sustrakałasia z kurataram amal štodnia, a paźniej — radziej.
Adnoj ź pieršych mišeniaŭ staŭ vuličny mastak Philippenzo — Filip Kozłoŭ, jaki ciapier žyvie ŭ Vilni. FSB užo mieła jaho ŭ raspracoŭcy i praz Fłores źbirała infarmacyju pra jaho. Jana raspaviadała kurataram navat takija drobiazi, jak dzie mastak jeść łokšynu i jakoje piva pje.
Kab spynić raspracoŭku, Fłores naŭmysna pasvaryłasia ź im. Paźniej hety pryjom jana vykarystoŭvała i ź inšymi ludźmi, jakich ad jaje patrabavała raspracoŭvać FSB.
Potym jana «pracavała» z akcyjanistam Paŭłam Krysievičam, jaki adbyŭ kala troch z pałovaj hadoŭ za pierformans na Krasnaj płoščy. FSB cikaviłasia jaho płanami, akcyjami i ludźmi, jakija ich finansujuć. Fłores znoŭ pasprabavała spynić raspracoŭku praz kanflikt — jana navat pisała pra mastaka hadaści jaho žoncy. U vyniku Krysievič źjechaŭ z Rasii.
Samy šakavalny epizod pačaŭsia letam 2025 hoda. Pavodle Fłores, FSB daručyła dapamahčy zabić Piatra Viarziłava, byłoha ŭdzielnika Pussy Riot, vydaŭca «Miedyjazony» — vydańnie, jakoje ličyć zabitych na vajnie rasijan. Fłores raniej była ź im u adnosinach.
Płan, pavodle jaje słoŭ, vyhladaŭ tak: Fłores pavinna była vymanić Viarziłava ŭ Sierbiju, zavieści jaho ŭ peŭnuju kaviarniu, dzie jaho ŭžo čakali b supracoŭniki FSB i kryminalniki. Paśla jaje vychadu z kaviarni Viarziłava płanavali skraści i zabić.
Za ŭdzieł u hetaj apieracyi joj abiacali ad 1 da 3 miljonaŭ rasijskich rubloŭ ( 12‑36 tysiač dalaraŭ) i bolš. Fłores kaža, što mienavita paśla hetaha zrazumieła: dalej zastavacca ŭ hetaj hulni niebiaśpiečna nie tolki dla jaje, ale i dla ludziej vakoł.
«Tut zdaryłasia kropka nieviartańnia. Kali raniej ja dumała, što mnie treba dačakacca prosta atrymańnia pašparta, roznymi sposabami jaho vykraści i źjechać, to tut ja zrazumieła, što… jany šmat što mohuć zrabić», — raspaviała Fłores.
Pavodle jaje, kuratary taksama «kala sta razoŭ» prasili znajści «chacia b častkovaje fota» doma Viarziłava va Ukrainie, kab možna było ŭstalavać pobač vybuchovaje prystasavańnie. Jana śćviardžaje, što FSB nienavidzić Viarziłava i šukaje mahčymaść jaho zabić.
Kab paźbiehnuć zadańnia, Fłores skazała kurataram, što paśla zamužža muž zabaraniaje joj sustrakacca ź inšymi mužčynami. Paralelna jana źviazałasia z advakatam Dźmitryjem Zachvatavym.
Zachvatavu jana raspaviała pra viarboŭku letam 2025 hoda. Spačatku jany navat razhladali varyjant zrabić vyhlad, što Fłores pahadziłasia na zabojstva Viarziłova, kab zatym zatrymać supracoŭnikaŭ FSB u Sierbii. Ale ad hetaha płana admovilisia: jon byŭ zanadta niebiaśpiečnym dla samoj Fłores.
U vyniku kala dziesiaci dzion tamu Zachvatavu ŭdałosia vyvieźci jaje z Rasii. Jak mienavita — advakat nie raskryvaje.
Fłores śćviardžaje, što za pieršyja miesiacy supracoŭnictva joj tolki adzin raz zapłacili 30 tysiač rubloŭ (360 dalaraŭ). Apošnija miesiacy jana atrymlivała ŭžo zarpłatu — 50 tysiač rubloŭ (600 dalaraŭ) kožnaha 15‑ha čysła. Apošniuju vypłatu atrymała ŭ červieni.
Ciapier Fłores vyrašyła publična raskazać pra ŭsio, kab dapamahčy inšym ludziam, jakich, pavodle jaje, FSB taksama mahła zavierbavać.
Ciapier čytajuć
Trahiedyja ŭ Barysaŭskaj balnicy: unučka pacyjenta kaža, što na jaho źviarnuli ŭvahu praz šeść hadzin, kali ŭžo piena pajšła z rota — jon pamior15
Kamientary