Stali viadomyja łaŭreaty premii «Hołas pakaleńnia svabody — 2026»
Abvieščanyja łaŭreaty premii «Hołas pakaleńnia svabody» za 2026 hod. Jaje ŭručajuć vydatnym pradstaŭnikam biełaruskaj pravaabarončaj, litaraturnaj i žurnalisckaj supolnaści va ŭzroście ad 65 hadoŭ, piša «Radyjo Svaboda».
Sioleta ŭznaharody atrymali mastačka i paetka Natalla Bordak (Natałka Chvoja), falkłaryst i hramadski dziejač Aleś Łozka, redaktar «Rehijanalnaj haziety» i były palitviazień Alaksandr Mancevič, piedahoh i aŭtarka adukacyjnych mietodyk Sofja Saviełava, historyk i redaktar Alaksandr Smalančuk, a taksama žurnalistka i pravaabaronca Tamara Ščapiotkina.
Imiony jašče troch łaŭreataŭ pakul nie raskryvajucca. Umovami premii praduhledžana mahčymaść nie nazyvać ich publična.
Pravaabaronca i łaŭreat Nobieleŭskaj premii miru Aleś Bialacki pavinšavaŭ sioletnich pieramožcaŭ i adznačyŭ ich vialiki ŭkład u toje, kab hołas biełarusaŭ byŭ čutny ŭ śviecie. Jon taksama pažadaŭ im zdaroŭja i novych tvorčych pośpiechaŭ.
Premija «Hołas pakaleńnia svabody» była zasnavanaja ŭ 2025 hodzie Biełaruskim PENam supolna z pravaabarončym centram «Viasna», Biełaruskaj asacyjacyjaj žurnalistaŭ, Pres-kłubam Biełaruś i Fondam «Svabodnaja presa dla Uschodniaj Jeŭropy». U 2026 hodzie da partnioraŭ dałučyŭsia Fond Alesia Bialackaha.
Uznaharoda pryznačanaja dla biełarusaŭ va ŭzroście 65+, jakija paśla 2020 hoda byli vymušanyja pakinuć Biełaruś praź pieraśled i praciahvajuć svaju dziejnaść u emihracyi ŭ Polščy, Litvie abo Čechii. Łaŭreaty atrymlivajuć finansavuju premiju na niekalki tysiač jeŭra, a ich historyi publikujucca ŭ admysłovym zborniku.
Prezientacyja zbornika «Hołas pakaleńnia svabody — 2026» adbudziecca 7 listapada ŭ Hdańsku ŭ Jeŭrapiejskim centry salidarnaści.
Kamientary