Chłopiec, što pravioŭ žyćcio ŭ płastykavym boksie. Sumnaja historyja
Devid Vieter pražyŭ žyćcio, jakoha nikomu nie pažadaješ. Finał byŭ trahičny, ale heta taksama historyja niejmaviernaj lubovi i baraćby.
Vieter naradziŭsia 21 vieraśnia 1971 hoda praz kiesarava siačeńnie. Jaho starejšy brat i ciozka, Devid Džozef Vieter III, pamior siamimiesiačnym. U dziciaci byŭ strašny dyjahnaz: alimfacytoz, heta ciažki kambinavany imunadeficyt. Pry im navat samaja lohkaja infiekcyja niasie dla čałavieka śmiarotnuju niebiaśpieku.
Adzinaje vyratavańnie dla takich dziaciej — transpłantacyja kaściavoha mozhu, inakš takija dzieci da dvuch hadoŭ, jak praviła, nie dažyvajuć.
Kali Devid jašče byŭ u žyvacie ŭ mamy, jaho baćkoŭ papiaredzili: mały maje 50% šansaŭ atrymać tuju ž chvarobu, što była ŭ jaho starejšaha brata. Tym nie mienš, budučyja baćki vyrašyli nie rabić abort. Adrazu paśla kiesaravaha siačeńnia Devida pieranieśli ŭ sterylny boks i pačali rychtavać da pierasadki kaściavoha mozhu. Ale ž kaściavy mozh siastry (jana była donaram dla starejšaha brata dziciaci) jamu nie padyšoŭ.
Miedyki vyrašyli: dzicia praciahnie žyć u sterylnym asiarodździ, pakul navuka nie prydumaje mietadu lačeńnia dla jaho chvaroby. Devidu pavialičyli boks, tak jon i ros, u adryvie ad ludziej. Chłopiec nie moh abniać svaich baćkoŭ, a im samim davodziłasia nadziavać śpiecyjalnyja palčatki, kab da jaho dakranucca.
Žyćcio chłopčyka stała bolš nasyčanym, kali ekśpierty NASA stvaryli dla jaho dziciačy skafandr. Tolki tady Devid vyjšaŭ sa svajoj sterylnaj burbałki, pabačyŭ navakolny śviet i atrymaŭ mahčymaść abdymać rodnych.
Historyja biez ščaślivaha kanca
Kali Devidu spoŭniłasia 12 hadoŭ, daktary ŭsio ž taki vyrašyli pieraščapić jamu kaściavy mozh siastry. Jany spadziavalisia na novyja leki, jakija b dapamahli nie dapuścić adprečvańnia pierasadžanaha materyjału arhanizmam chłopčyka.
Tak Devid vyjšaŭ sa svajoj kamiery. Ale ščaście było niadoŭhim: kaściavy mozh jaho siastry akazaŭsia infikavany virusam Epštejna-Bar, arhanizm z nulavym imunitetam byŭ niazdolny dać hetamu rady. U chłopčyka raźviŭsia rak, i ŭ 1984 hodzie jon pamior.
Z punktu hledžańnia etyki historyja Devida vielmi składanaja. Z adnaho boku, chłopčyk pražyŭ strašenna ciažkaje žyćcio. Tolki ŭjavicie sabie: usio žyćcio ŭ skafandry, usia ježa sterylizavanaja. Devidu taksama nie chapała kamunikacyi ź inšymi ludźmi, z časam heta stała ŭpłyvać na jaho psichičny stan.
Ale ž pry hetym žyćcio «chłopčyka ŭ boksie» dało navukoŭcam mahčymaść padrabiazna vyvučyć na žyvym čałavieku, jak praciakaje alimfacytoz. Ciapier dzieci, što majuć toj ža dyjahnaz, atrymlivajuć naležnaje lačeńnie ci prachodziać praz transpłantacyju. Hałoŭnaje, kab chvarobu vyjavili na pačatkovych stadyjach — i tady prahnoz dobry.
«Moža, bajaŭsia zastavacca ŭ šlubie sa mnoj, bo pracuje na BT». Nastaŭnica, jakaja źjechała praz danosy Bondaravaj, raspaviała pra razvod i žyćcio ŭ emihracyi1414
Kamientary