«Svaboda»: Morhi Homiela i Mazyra pierapoŭnienyja trupami rasijan, ich viazuć u aeraport, ale pačali zakopvać i ŭ Biełarusi

Ź pieršaha dnia vajny biełaruskija špitali ŭ Homieli, Mazyry i Naroŭli pačali prymać paranienych rasijan, a morhi — zabitych.

Ź biełaruskich miedykaŭ, jak stała viadoma «Svabodzie», uziali padpisku ab nierazhałošvańni infarmacyi. Niekatorym lekaram pahražali skasavańniem kantrakta.

Ad krynic z treciaha sakavika pastupaje infarmacyja, što morhi ŭ Mazyry i Homieli pierapoŭnienyja trupami rasijan. U Mazyry ź minułaha tydnia ich adrazu hruzili ŭ ciahniki rasijskaj čyhunki.

«Trupaŭ było nierealna šmat! Ludzi, jakija byli na stancyi Mazyr, byli prosta ŭ šokavym stanie ad kolkaści trupaŭ, jakija zahružali ŭ ciahnik.

Ludzi pačali zdymać videa, ale da ich pryčapilisia vajskoŭcy i zahadali vydalić. U vioscy Kamienka pad Mazyrom ačapili mohiłki, nikoha tudy nie puskajuć, vystavili achovu. Moža być, što tam pačali chavać rasijan. Tym bolš, pobač z Kamienkaj — Bokaŭ, tam aeradrom i bujny łahier rasijan», — kaža žychar Mazyra.

Inšaja krynica kaža, što špital u Mazyry dahetul pierapoŭnieny paranienymi, absalutna ŭsie lekary, navat vuzkija śpiecyjalisty, pracujuć z paranienymi rasijanami. Tym časam miascovyja žychary nie mohuć zrabić tut renthien — ich nakiroŭvajuć u dziciačuju balnicu.

Žychary Homla taksama raskazvajuć, što i aŭtobusy PAZ (z paranienymi rasijanami) i hruzaviki «Urał» (z zabitymi) — častaje vidovišča ŭ abłasnym centry.

«Na «Urałach» ich trupy viazuć u aeraport, adtul — u Rasiju», — kaža žychar Homiela.

U homielskim Centry radyjacyjnaj miedycyny paranienych rasijan prymajuć ad pačatku vajny. Tudy pryjechali i zaniali niekalki pavierchaŭ rasijskija lekary. Prymajuć paranienych u špitali ŭ Kaściukoŭcy, u Balnicy chutkaj dapamohi i ŭ abłasnoj kliničnaj.

«Svaboda» ŭžo davała infarmacyju pra toje, što morhi Mazyra i Homiela pierapoŭnienyja rasijskimi vajskoŭcami. Abviaržeńnia hetaj infarmacyi z boku biełaruskich ci rasijskich uładaŭ nie było.

Na BT 12 sakavika vyšaŭ siužet, u jakim karespandenty nazyvajuć trupy rasiejskich vajskoŭcaŭ u morhach Mazyra — fejkam. 

Alaksandr Łukašenka śćviardžaŭ, što lačeńnie ŭ Biełarusi atrymali kala 160-170 rasijan, paranienych u bajach z ukraincami. «My lačyli i budziem lačyć hetych dziaciej — u Homieli, Mazyry i, pa-mojmu, niejkim rajonnym centry», — kazaŭ Łukašenka.

Rasija pačała ŭzbrojenaje ŭvarvańnie va Ukrainu 24 lutaha, u tym liku z terytoryi Biełarusi.

• 0
• 0
• 0
• 0
• 0
• 0
• 0
• 0