Štučny intelekt rasšyfravaŭ list Napaleona, jaki zastavaŭsia zahadkaj 217 hadoŭ

U 1809 hodzie Francyja rychtavałasia da novaj vajny z Aŭstryjaj. Adzin z hienierałaŭ Napaleona Ahiust de Marmon u hety čas znachodziŭsia na terytoryi sučasnaj Charvatyi, udalečyni ad asnoŭnych francuzskich sił. Mienavita jamu Napaleon nakiravaŭ zašyfravanyja rasparadžeńni praz svajho pasynka Ežena.

List składaŭsia prykładna z 1300 znakaŭ. Častka ź ich abaznačała asobnyja litary, a inšyja cełyja słovy. Kluč da šyfru byŭ stračany, tamu bolš za dva stahodździ źmiest pasłańnia zastavaŭsia nieviadomym.

Jak piša The Telegraph, rasšyfravać jaho ŭdałosia inžynieru kampanii SentinelOne Karteru Čerču (Carter Church). Dla hetaha jon vykarystaŭ sistemu štučnaha intelektu OpenAI GPT-6 Astra.

Spačatku ŠI raspaznavaŭ i pierapisvaŭ simvały ź lista. U jakaści adpraŭnoj kropki jon vykarystaŭ pracu kryptohrafaŭ, jakim raniej udałosia vyznačyć značeńnie 33 znakaŭ.

Paśla sistema pačała vyznačać značeńni nieviadomych znakaŭ. Dla hetaha jana praviarała roznyja varyjanty i aceńvała, nakolki atrymanyja spałučeńni charakternyja dla francuzskaj movy. U jakaści ŭzoraŭ vykarystoŭvalisia tvory Viktora Hiuho i Alaksandra Dziuma, a taksama miemuary Marmona. Tak udałosia rasšyfravać astatniuju častku pasłańnia i vyśvietlić, što niekatoryja znaki abaznačali nie asobnyja litary, a cełyja słovy.

Sam Čerč raskazvaje, što raniej nikoli nie zajmaŭsia ŭzłomam šyfraŭ. Pavodle jaho, pasprabavać rasšyfravać list Napaleona jaho padšturchnuŭ ekśpierymient z GPT-6 Astra inšaha daśledčyka. Sistemie dali zadańnie znajści i rasšyfravać nierazhadanaje paviedamleńnie niamieckaj armii, zakadavanaje mašynaj Enigma ŭ 1941 hodzie. ŠI spraviŭsia ź im prykładna za dziesiać hadzin.

Rasšyfravany list Napaleona tyčyŭsia padrychtoŭki da vajny pamiž Francyjaj i Habsburhskaj impieryjaj. Aŭstryja tady rychtavałasia da novaj vajny, spadziejučysia viarnuć stračanyja raniej terytoryi.

Pavialičyć

U pasłańni Marmonu paviedamlałasia pra miescaznachodžańnie i kolkaść francuzskich i aŭstryjskich vojskaŭ. Hienierału zahadvali rychtavacca da pachodu i nie davać siabie «zapałochać niekalkimi atradami abo zboryščam zbrodu».

«Aŭstryja budzie nieadkładna atakavanaja z usich bakoŭ. Takim čynam, jana imkliva nabližajecca da svajoj hibieli», — havaryłasia ŭ liście.

U vyniku armija Marmona zmahła vyjści z Charvatyi i dałučycca da asnoŭnych sił Napaleona. Jana ŭdzielničała ŭ bitvie pry Vahramie, dzie francuzskaja armija pieramahła aŭstryjcaŭ. Paśla hetaha Marmon atrymaŭ zvańnie maršała.

Jak adznačaje sam Čerč, rasšyfravać list možna było i biez štučnaha intelektu. Ale śpiecyjalistu na takuju pracu mahli spatrebicca tydni, tamu bolš za dva stahodździ zašyfravanaje pasłańnie tak i zastavałasia niepračytanym. Z dapamohaj GPT-6 Astra inžynier spraviŭsia značna chutčej. Pa jaho słovach, na pracu było patračana niekalki viečaroŭ, a madel pracavała ahułam kala šaści hadzin.

Adnak zdolnaść ŠI chutka analizavać vialikuju kolkaść varyjantaŭ moža mieć i inšaje prymianieńnie. Daśledčyki adznačajuć, što takija sistemy mohuć, naprykład, vyjaŭlać ludziej, jakija stajać za ananimnymi akaŭntami, supastaŭlajučy asablivaści ich piśma ź inšymi danymi.

• 8
• 0
• 0
• 0
• 0
• 0
• 0
• 0