U Teatry junaha hledača, jaki ŭznačaliła žonka Makieja, staviać Bykava pa-rusku
U červieni ŭ Teatry junaha hledača adbudziecca premjera śpiektakla «Alpy. Sorak pieršy», stvoranaha pa matyvach apovieści Vasila Bykava «Alpijskaja bałada». Jaho pakažuć na ruskaj movie.
U Biełarusi dziejničajuć 29 prafiesijnych teatraŭ. Ź ich vyklučna na biełaruskaj pracujuć usiaho šeść. Adzin ź ich — Teatr junaha hledača. Viasnoj hetaha hoda tam pa matyvach sieryi knih «Pijaniery-hieroi» pastavili śpiektakl «Čas vybraŭ ich». Jon idzie na ruskaj movie. Premjera nastupnaha śpiektakla, «Kientervilijski pryvid» prajšła pa-biełarusku, ale afiša ŭžo była ruskamoŭnaj, źviartaje ŭvahu Zerkalo.io.
Ciapier u repiertuary teatra źjavicca druhi śpiektakl, pieršapačatkova zajaŭleny na ruskaj. Kali palityka novaha kiraŭnictva TIUHa zastaniecca raniejšaj, u Biełarusi zastanucca ŭsiaho piać teatraŭ, jakija pracujuć na rodnaj movie.
Pryčym Vasil Bykaŭ pisaŭ svaje tvory — u tym liku, i znakamituju «Alpijskuju baładu» — vyklučna pa-biełarusku.
U krasaviku 2022 hoda dyrektaram TIUHa stała aktrysa Viera Palakova, žonka ministra zamiežnych spraŭ Biełarusi Uładzimira Makieja. Jana źmianiła na hetaj pasadzie Uładzimira Savickaha, zvolnienaha ŭ studzieni hetaha hoda.
U kancy sakavika 2022-ha Palakova raskazała, što teatr pavinien admovicca ad pracy vyklučna na biełaruskaj movie: «Ja liču, śpiektakli pavinny być na dźviuch movach: i na biełaruskaj, i na ruskaj. Tady ŭ teatra jość kamiercyjnaja historyja. < … > Dziaržava zaŭsiody praciahnie nam ruku dapamohi, ale my nie pavinny siadzieć na hetaj pryščepcy. My pavinny navučycca sami zarablać hrošy».
Viera Palakova naradziłasia ŭ 1978 hodzie. Paśla zakančeńnia akciorskaha fakulteta Akademii mastactvaŭ z 2003 hoda pracavała ŭ trupie minskaha Teatra-studyi kinaakciora. Źjaŭlajecca kiraŭnicaj pryvatnaha prajekta «Trytfarmat».
Ciapier čytajuć
«Kali pasadziać znoŭ, to pasiadžu». Pačobut pra svajo vyzvaleńnie, kamiery śmiarotnikaŭ, bitvu za honar u sudzie i žadańnie viarnucca11
Kamientary