Miadźviedzieŭ pryhraziŭ Ukrainie «Sudnym dniom» u vypadku ŭdaraŭ pa Krymie
Pad «Sudnym dniom» časta majecca na ŭvazie jadzierny apakalipsis.
Namieśnik staršyni Rady biaśpieki Rasiei Dźmitryj Miadźviedzieŭ paabiacaŭ, što schavacca ad rasiejskaha adkazu na ŭdary pa Krymie «budzie vielmi składana». Ab mahčymaści ŭdaraŭ pa rasijskich vajskovych abjektach na paŭvostravie raniej zajavili ŭ Ministerstvie abarony i Ofisie prezidenta Ukrainy.
Niekatoryja palityki na Ukrainie — «ekzaltavanyja, kryvavyja kłoŭny», — skazaŭ Miadźviedzieŭ, — čas ad času pahražajuć Rasiei, «majučy na ŭvazie napad na Krym», ale pry takim raźvićci padziej «dla ich usich tam za adzin raz nastupić Sudny dzień», zajaviŭ na sustrečy ź vieteranami ŭ Vałhahradzie Miadźviedzieŭ, cytujuć jaho rasijskija infarmahienctvy.
«Schavacca budzie vielmi składana», — paabiacaŭ Miadźviedzieŭ. Jon vykazaŭ upeŭnienaść, što tyja, pra kaho jon havoryć, razumiejuć nastupstvy svaich zajaŭ.
Miadźviedzieŭ dadaŭ, što ŭsie, chto admaŭlajecca pryznać Krym rasijskim, źjaŭlajucca dla Rasii «sistemnaj pahrozaj».
Napiaredadni pradstaŭnik hałoŭnaha ŭpraŭleńnia raźviedki Minabarony Ukrainy Vadzim Skibicki papiaredziŭ, što Kijeŭ moža vykarystoŭvać amierykanskija RSZA HIMARS dla udaraŭ pa rasiejskim abjektaŭ u Krymie. Jon nazvaŭ paŭvostraŭ «chabam pieramiaščeńnia ŭsioj rasijskaj techniki, bojeprypasaŭ i ŭzbrajeńnia» na poŭdzień Ukrainy, a z akvatoryi Čarnamorskaha fłota, pavodle jaho słoŭ, ździajśniajucca rakietnyja puski na ŭkrainskuju terytoryju.
U toj ža čas Minabarony Ukrainy paabiacała nie vykarystoŭvać HIMARS dla ŭdaraŭ pa Rasii.
Daradca kiraŭnika Ofisa prezidenta Ukrainy Alaksiej Arastovič zajaviŭ, što dadzienaje zachodnim partnioram abiacańnie nie bić pa celach na rasiejskaj terytoryi nie raspaŭsiudžvajecca na Krymski most — jon moža stać abjektam udaru VSU, jak tolki ŭ Kijeva «źjavicca pieršaja techničnaja mahčymaść». «Pa im idzie zabieśpiačeńnie [vajennaj] technikaj, značyć, jaho treba pałamać», — rastłumačyŭ Arastovič.
Ciapier čytajuć
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»1414
Kamientary
hety hnom pra siabie?