Ministr kultury Ukrainy vyklučyŭ demantaž manumienta «Baćkaŭščyna-maci» ŭ Kijevie
Ministr kultury Ukrainy Alaksandr Tkačenka ličyć zakliki da demantažu manumienta «Baćkaŭščyna-maci» ŭ Kijevie absurdam. U efiry adzinaha telemarafona ŭ niadzielu jon skazaŭ, što heta adna ź vizitovak Ukrainy, a hrošy, jakija byli b patrebnyja na demantaž, možna vydatkavać z bolšaj karyściu.
«Znosić słavutaść, jakaja źjaŭlajecca adnoj ź vizitovak Ukrainy, jakaja hladzić na ŭschod, jakaja vielizarnaja atrakcyja dla mnohich turystaŭ, mnie zdajecca absurdam u hety čas. U nas jość na što tracić srodki. U nas niama srodkaŭ u biudžecie, tamu što jany pajšli na abaronu i na padtrymku sacyjalnaj śfiery.
Muziei Haładamoru, nam treba pabudavać muziej Hierojaŭ Niabiesnaj sotni, treba pracavać z mnohimi abjektami — heta bolš za 450 abjektaŭ, jakija atrymali paškodžańni abo byli razburanyja padčas vajny. A zajmacca demantažom «Baćkaŭščyny-maci» možna tolki ŭ chvaravitym ujaŭleńni», — skazaŭ Tkačenka.
U lipieni ŭ mabilnaj prahramie «Dija» ŭkraincy pravodzili apytańnie, što rabić z hierbam SSSR na ščycie «Baćkaŭščyny-maci». 85% respandentaŭ zajavili, što jaho treba zamianić na Tryzub.
Pa słovach Tkačenki, raboty z hierbam SSSR na ščycie manumienta mohuć pačacca prykładna praz paŭhoda.
«Dumaju, što paśla zaćviardžeńnia płana dziejańniaŭ, jaki nam padaŭ muziej Druhoj suśvietnaj vajny — praduhledžana techničnaje abśledavańnie, pryciahnieńnie śpiecyjalistaŭ dla prajektnaj dakumientacyi — pavinna prajści dzieści paŭhoda ci krychu bolš dla taho, kab my ŭščylnuju prystupili ŭžo da rabot», — skazaŭ ministr.
U 2019 hodzie kiraŭnik Ukrainskaha instytuta nacyjanalnaj pamiaci Anton Drabovič kazaŭ, što dekamunizacyja manumienta «Baćkaŭščyna-maci» budzie kaštavać vielmi doraha. Pavodle jaho słoŭ, u Instytuta elektrazvarki imia Patona jość rašeńnie, jak demantavać saviecki hierb, ale jano darahoje.
«Prablema ŭ čym? Kab prosta zrezać jaho ci nahruzić lulkaj — jana moža prosta pieravažyć.
Tam vielmi składanaja inžyniernaja kanstrukcyja, jaje nielha razbałansavać, tam majatnik u ruce ź miačom, jaki ŭraŭnavažvaje statuju. Kali my paviesim šmat inžyniernych pryładaŭ, kab zdymać, demantavać hety ščyt, jon moža pierakulić statuju», — tłumačyŭ Drabovič.
Zhodna z pryniatym u 2015 hodzie Zakonam ab zabaronie kamunistyčnaj simvoliki miascovyja ŭłady abaviazanyja źnieści ŭsie pomniki savieckim dziejačam. Ale niahledziačy na toje, što pomnik «Baćkaŭščyna-maci» źviazany z kamunistyčnym režymam, jaho vyrašyli nie demantavać. A saviecki hierb sa ščyta źbiralisia prybrać kaliści paźniej.
«Baćkaŭščyna-maci» — manumientalnaja skulptura ŭ Kijevie, raźmieščanaja na vysokim pravym bierazie Dniapra na terytoryi Nacyjanalnaha muzieja historyi Ukrainy ŭ Druhoj suśvietnaj vajnie. Adkrytaja ŭ 1981 hodzie, ličycca samaj vysokaj manumientalnaj skulpturaj u Jeŭropie.
«Viedajecie, jak kamientuje vaša zatrymańnie apazicyja? «Aryštavany pamahaty režymu». Turemnaja spoviedź lidara prafsajuzaŭ Jarašuka1
«Viedajecie, jak kamientuje vaša zatrymańnie apazicyja? «Aryštavany pamahaty režymu». Turemnaja spoviedź lidara prafsajuzaŭ Jarašuka
«Ruki preč ad sasisačak!». U sacsietkach horača abmiarkoŭvajuć baraćbu Łukašenki z kavaj na zapraŭkach. Niekatoryja zaklikajuć dziejničać bolš žorstka77
Kamientary