Pamiežny kamitet: Dziejańni polskich uład mohuć pryvieści da kałapsu abapał miažy
Zakryćcio Polščaj pamiežnaha punkta propusku «Babroŭniki» na polska-biełaruskaj miažy moža pryvieści da transpartnaha kałapsu na inšych pahranpierachodach, ad jakoha pacierpiać hruzapieravozčyki i žychary dźviuch krain. Pra heta zajaviŭ pres-sakratar Dziaržaŭnaha pahraničnaha kamiteta Biełarusi Anton Byčkoŭski ŭ efiry STB.
«Abjektyŭnych pryčyn dla pryniaćcia takoha rašeńnia biełaruski bok nie bačyć, bo pahrozy z terytoryi Biełarusi niama. Z ulikam zakryćcia punkta propusku «Babroŭniki» na polskim napramku z šaści punktaŭ propusku zastaniecca tolki dva: adzin — dla hruzavoha transpartu — «Kukuryki» i adzin dla lehkavoha — «Ciarespal». Nahruzka na astatnija maršruty istotna pavialičycca, što niehatyŭna adabjecca na abstanoŭcy ŭ pamiežžy i moža pryvieści da kałapsu ŭ punktach propusku», — zajaviŭ pres-sakratar Dziaržpahrankamiteta Biełarusi Anton Byčkoŭski.
Jon adznačyŭ, što ad rašeńnia polskaha boku pacierpiać hruzapieravozčyki, zvyčajnyja hramadzianie i žychary pamiežža pa abodva baki miažy.
Raniej u Dziaržpahrankamitecie zaklikali ŭličvać infarmacyju ab zakryćci punkta propusku «Bierastavica — Babroŭniki» pry płanavańni pajezdak.
Nahadajem, pa rašeńni polskaha boku, z 10 lutaha z 12:00 (u 14:00 pa minskim časie) polski punkt propusku «Babroŭniki» aficyjna prypyniaje afarmleńnie transpartnych srodkaŭ i asob, jakija jeduć praź miažu, na niavyznačany čas.
Raniej, u 2021 hodzie, polski bok z-za mihracyjnaha kryzisu zakryŭ punkt propusku na biełaruska-polskaj miažy «Bruzhi — Kuźnica Biełastockaja». Jašče raniej, u 2020 hodzie, pa inicyjatyvie polskaha boku z-za COVID-19 byli začynienyja punkty propusku «Słavatyčy — Damačava» i «Połaŭcy — Piasčatka».
Takim čynam, na biełaruska-polskaj miažy zastajecca tolki dva dziejnyja punkty propusku: dla hruzavoha transpartu ŭ Polšču zastajecca adziny punkt propusku «Kukuryki» (ź biełaruskaha boku «Kazłovičy»), a dla lehkavoha — punkt propusku «Ciarespal» (ź biełaruskaha boku «Brest»).
Ciapier čytajuć
Čaho čakaje Polšča ad Minska i ci zakryje znoŭ miažu na hetym tydni?16
Kamientary